Thumanë – Një tjetër incident me armë zjarri ka tronditur paraditen e sotme zonën e Thumanës. Rreth orës 11:00, në parkimin e një lokali, një automjet në pronësi të shtetasit K. M. është bërë shënjestër e të shtënave me armë zjarri, pas një konflikti të çastit që dyshohet se ka pasur motive të dobëta. Fatmirësisht, nga të shtënat nuk ka pasur persona të lënduar.
Autori i dyshuar është larguar menjëherë nga vendi i ngjarjes me një automjet, i cili është identifikuar nga Policia, por për arsye hetimi, nuk bëhen me dije detaje të mëtejshme.
Në vendngjarje ndodhet grupi hetimor, i cili gjatë këqyrjes paraprake ka sekuestruar dy gëzhoja që pritet të ndihmojnë në zbardhjen e plotë të rrethanave.
Policia ka nisur punën intensive për identifikimin, lokalizimin dhe kapjen e autorit të ngjarjes. Ndërkohë, materialet i janë referuar Prokurorisë për veprime të mëtejshme hetimore.
