Tiranë- Është publikuar sot akti i ekspertimit të thikës së përdorur në vrasjen e ndodhur pranë shkollës “Fan Noli” ku një 14 vjeçar vrau me thikë bashkëmoshatarin e tij dhe plagosi me thikë një tjetër.
Sipas akt-ekspertimit, thika me të cilën u krye krimi është përdorur vetëm nga autori i arrestuar M.P.
Në thikë janë gjetur gjurmë ADN-je të 14 vjeçarit të vrarë M.C dhe shokut të tij L.M i cili mbeti i plagosur.
Ndërkohë pavarësisht se i mituri i plagosur ka deklaruar se në vendngjarje kanë qenë dy persona me thikë, policia i mbetet versionit zyrtar duke thënë se ka qenë vetëm autori i arrestuar ai që ka goditur me thikë viktimën dhe të plagosurin.
Gjatë përleshjes me ta, autori i krimit ka lënduar edhe veten me thikë në një pjesë të krahut.
Ditë më parë avokatët e të miturit të arrestuar kanë ankimuar masën “arrest me burg” me arsyetimin se ai e ka kryer krimin teksa përpiqej të vetëmbrohej gjatë përleshjes fizike. Në një seancë maratonë që zgjati rreth 8 orë, M.P është ballafaquar me të miturit që ndodheshin në vendngjarje.
Gjithashtu u bë ballafaqimi i të plagosurit L.M i cili pretendonte se në vendngjarje ka qenë një autor i dytë dhe kushëririt të tij të parë i cili përkundër versionit të dhënë, tha se nuk kishte identifikuar asnjë person tjetër të përfshirë në krim përveçse 14 vjeçarit që tashmë është arrestuar. Versus.al
