Një tragjedi e dyfishtë ajrore ka tronditur Indinë, ku 7 persona, mes tyre edhe një fëmijë 23-muajsh, humbën jetën sot nga rrëzimi i një helikopteri civil Bell 407 pranë fshatit Gaurikund, në shtetin Uttarakhand. Helikopteri, që transportonte pelegrinë nga Kedarnath, u rrëzua pak pas ngritjes, me autoritetet që dyshojnë se moti i keq dhe shikueshmëria e dobët ishin shkaqet kryesore të aksidentit.
Forcat e shpëtimit, NDRF, SDRF dhe policia lokale, mbërritën me shpejtësi në vendngjarje, por pa mundur të shpëtojnë të mbijetuar. Qeveria e Uttarakhandit urdhëroi pezullimin e fluturimeve me helikopter për dy ditë dhe formimin e një komiteti ekspertësh që do të hetojë shkaqet e aksidentit dhe do të vendosë rregulla më të rrepta sigurie.
Një tjetër tragjedi ajrore që tronditi vendin pak ditë më parë ishte rrëzimi i avionit Air India (Boeing 787) që po fluturonte nga Ahmedabad drejt Londrës. Aksidenti la 270 të vdekur, me vetëm 1 të mbijetuar, dhe nxiti autoritetet të urdhërojnë mirëmbajtje shtesë dhe kontrolle të rrepta të flotës ajrore.
Fluturimet ajrore në Indi po kalojnë aktualisht një moment të vështirë, me dy aksidente tragjike që theksojnë nevojën urgjente për masa më të rrepta sigurie, inspektime, dhe protokolle më të qarta për të garantuar jetën e pasagjerëve. Versus.al
