Fier- Ish-kryebashkiaku i zgjedhur i Himarës, Fredi Beleri është liruar sot nga qelia pas seancës së mbajtur në gjykatë ku kërkoi lirimin me kusht. Seanca e sotme ishte vendimtare për çështjen e Belerit.
“Urdhëroi lirimin para kohe. I kishin mbetur 6 javë për të bërë. Respekte për gjykatën. U tregua e pavarur” tha avokati Geni Gjyzari pas seancës.
Teksa komentoi vendimin për lirimin me kusht të Belerit, ai thumboi edhe kryeministrin Edi Rama duke thënë se lirimi i klientit të tij erdhi vetëm pas përfundimit të zgjedhjeve në Himarë.
“Ai pronari që ka çelësat dha çelësat që të dalë tani pas zgjedhjeve”- ka deklaruar avokati i Belerit jashtë gjykatës.
Fredi Beleri u arrestua në 12 maj të vitit 2023, vetëm 2 ditë para zgjedhjeve vendore të 14 majit pasi u kap në flagrancë duke blerë 8 vota në këmbim të 40 mijë lekëve. Pas zgjedhjeve, rezultoi se Beleri ishte fitues përballë kandidatit socialist Jorgo Goro. Vazhdimisht Beleri kërkoi leje nga Drejtoria e Burgjeve për të kryer betimin si kryebashkiak, por një kërkesë e tillë nuk iu plotësua.
Ndërkohë që Beleri u dënua me 2 vite burg për korrupsion zgjedhor, pozicionin e kryebashkiakut vijoi ta ushtronte socialisti Jorgo Goro i cili u arrestua në mars nën akuzën e tjetërsimit të pronave. Goro u pasua nga Blerina Bala e cila u zgjodh nga këshilli bashkiak, për të qëndruar në krye të bashkisë për vetëm 2 muaj e pak ditë pasi vendosi të jepte dorëheqjen për arsye personale.
Bala u pasua nga Arqile Bollano i cili mbajti postin e kryebashkiakut deri më 4 gusht kur u mbajtën zgjedhjet e parakohshme që presidenti Begaj dekretoi pasi KQZ shpalli të pavlefshëm mandatin e Fredi Belerit në 5 korrik.
Pavarësisht se në qeli, më 14 korrik Belerit iu dha leja për të marrë pjesë në betimin e tij si eurodeputet në Parlamentin Europian pasi u zgjodh në Greqi në listat e partisë së Mitsotakis “Demokracia e Re”.
Çështja Beleri shkaktoi dëmtim të raporteve mes vendit tonë dhe Greqisë fqinje e cila kërcënoi me bllokim të anëtarësimit të Shqipërsisë në BE./ Versus.al
