Më 15 tetor Gjykata e Lartë vendos lidhur me kërkesën e dorëzuar nga Ervin Salianji mbi pezullimin e dënimit ndaj tij, deri në marrjen e një vendimi përfundimtar nga Gjykata e Lartë lidhur me vendimin e dhënë nga Apeli i Tiranës ditë më parë duke e dënuar me 1 vit burg ish-deputetin.
Kërkesa e Salianjit për pezullim, do të shqyrtohet në dhomë këshillimi nga gjyqtari Sokol Binaj.
Më 26 shtator Apeli i Gjykatës së Tiranës la në fuqi vendimin e gjykatës së Shkallës së Parë të marrë në 2019-ën për dënimin me 1 vit burg për Ervin Salianjin nën akuzën e kallëzimit të rremë në dosjen “Babale”. Në daljen e tij për mediat, Salianji hodhi akuza ndaj gjyqtarëve për vendim të parapërgatitur, ndërsa tha se është i pari i dënuar politik që prej diktaturës.
Më 27 shtator, Salianji pasi u konsultua edhe me deputetët e grupit parlamentar demokrat, i qëndroi vendimit të tij për t’u dorëzuar në polici nga ku më pas u transferua për të vuajtur dënimin në qelinë e burgut të Fierit. Ndërsa të hënën, Spiropali lexoi në Kuvend shkresën e prokurorisë së Tiranës duke shpallur kështu vakant mandatin e deputetit Salianji të cilin pritet ta marrë pasuesi i tij në listën e Korçës, Andrea Mano.
Dënimi i Salianjit, solli edhe nisjen e një aksioni të dhunshëm opozitar nga Partia Demokratike. Në seancë plenare, deputetët hodhën sende të forta ndaj Spiropalit e ministrave dhe kulmuan me djegien e karrigeve të deputetëve jashtë godinës së parlamentit. Për pasojë për 24 prej tyre u vendos përjashtimi nga seancat plenare. Kjo gjë nuk i pengoi të mblidheshin sërish para Kuvendit ditën e djeshme ku u përplasën me gardën dhe deputetët e tjerë socialistë. Versus.al
