Ministrja e Jashtme, Elisa Spiropali ka reaguar lidhur me komentet e shumta në rrjetet sociale të cilat jo vetëm që nuk kanë dënuar aktin e rëndë të vrasjes së gjyqtarit Astrit Kalaja në sallën e gjyqit, por e kanë përgëzuar.
Duke e komentuar si “tronditëse”, Spiropali tha se është e indinjuar nga tentative për të justifikuar vrasësin për krimin e rëndë që kreu. Sipas saj, urrejtja ndaj viktimave dhe lartësimi i agresorëve nuk mund të jetë pjesë e Shqipërisë Europiane.
Ajo shtoi se duhet një ndërgjegjësim për masat e ardhshme ligjore që duhet të mbrojnë dinjitetin e qytetarit dhe se komentet që përgëzojnë autorin për vrasjen, nuk mund të jenë fytyra e shoqërisë shqiptare.
Reagimi i plotë:
Jashtëzakonisht tronditëse përpjekja e këtyre ditëve për të glorifikuar aktin barbar të vrasjes së gjyqtarit Kalaja përmes një serie publikimesh në media, pasuar nga një lum komentesh të neveritshme në adresë të viktimës. Po aq indinjuese është edhe tentativa për të justifikuar vrasësin për veprimin ekstrem që mori një jetë njeriu dhe lëndoi dy të tjerë. Urrejtja mbi viktimat dhe lartësimi i agresorëve duke shfrytëzuar lirinë për të shkruar e komentuar në hapësirën digjitale, nuk mund të jetë kurrsesi Shqipëria Europiane.
Ndërkohë që me BE-në po negociojmë për t'iu afruar përherë e më shumë standardeve të medias e etikës demokratike europiane, nevojitet një ndërgjegjësim dhe reflektim i plotë për masat e ardhshme ligjore që mbrojnë dinjitetin e individit, po aq sa edhe lirinë e shprehjes.
Publikimet e paverifikuara mbi protagonizmin vrastar dhe vala e komenteve baltosëse në rrjetet sociale mbi viktimën nuk mund të jetë kurrsesi fytyra e shoqërisë shqiptare. Shqipëria e vërtetë është shumë më shumë se kaq; është vlerë, është respekt, është dinjitet! Ngushëllimet më të ndjera familjarëve të gjyqtarit Kalaja dhe solidaritet me gjyqtarët, prokurorët dhe gjithë shërbëtorët e shtetit shqiptar! Versus.al
