Mazhoranca propozon që të ketë jo më shumë se 50 bashki në vend, duke paralajmëruar shkrirjen apo bashkimin e bashkive të vogla, për të cilat ka patur reagime dhe protesta nga qytetarët.
Në mbledhjen e sotme të drejtuesve politikë socialistë të qarqeve me Ramën, u bë publike raporti i bashkëkryetarit të Komisionit për Reformën Territoriale, Arbjan Mazniku.
Burime nga brenda mbledhjes bëjnë me dije se projekti i ri i paraqitur nga Mazniku parashikon që numri i bashkive të mos i kalojë 50, nga 61 që janë aktualisht.
Ndërsa projektligji pritet të depozitohet në Kuvend brenda muajit korrik, pasi të kalojë me votat e deputetëve të PS në Komisionin e Posaçëm për Reformën Territoriale.
Po ashtu, në shtator projekti i ndarjes së re territoriale pritet të shqyrtohet në komisionet parlamentare, edhe pse opozita ka dalë hapur kundër.
Socialistët planifikojnë që deri në javën e parë të tetorit, në Parlament të miratohet ndarja e re territoriale.
Ky votim pritet të kërkojë 84 vota, të cilat mazhoranca socialiste nuk i ka e vetme, ndaj duket se do të kërkojë edhe mbështetjen e tre deputetëve të PSD-së së Tom Doshit./Versus.al
