Pas dënimit me 1 vit burg të deputetit demokrat Ervin Salianji i cili u burgos ditën e premte, opozita do të ketë sot një mbledhje të Këshillit Kombëtar ndërsa nesër para seancës plenare, do të mbledhë grupin parlamentar në orën 17:00 për të përcaktuar mënyrën sesi do të vijohet qëndrimi i tyre në Kuvend.
Vetë kreu i grupit parlamentar Gazment Bardhi ka deklaruar se opozita do ndërpresë çdo lloj marrëdhënie parlamentare dhe institucionale me qeverinë dhe do i rikthehet bojkotit në Kuvend. Ndërsa sot, deputeti Luan Baçi i ftuar në studion e “News 24” deklaroi se nuk përjashtohet as mundësia e ngujimit të deputetëve demokratë në Kuvend.
"Nesër para seancës parlamentare, do të ketë një mbledhje të grupit parlamentar ku do diskutohen detaje për mënyrën sesi ne do vahdojmë marrëdhëniet me parlamentin. Mënyra sesi do qëndrojmë ne në parlament nuk mund ta vendosim ne këtu në studio. Do ketë konsensus për të gjetur mënyrën për të bërë sensibilizim edhe të ndërkombëtarëve. Ide dhe diskutime ka shumë. Janë të shumta opsionet që nga ngujimi në parlament apo mënyra sesi ne mund të sillemi”- deklaroi Baçi.
Për rastin e Salianjit, u janë dërguar letra përfaqësive diplomatike të huaja në vendin tonë, ndërsa opozita është zotuar të intensifikojë aksionin e saj. Versus.al
