Sekretariati i Etikës ka ndëshkuar deputetin Flamur Noka me përjashtim 10 ditor nga seancat plenare të Kuvendit pas seancës të së enjtes së kaluar ku ligjvënësi demokrat u përplas me kryeparlamentaren Lindita Nikolla dhe më pas pavarësisht përjashtimit, u rikthye duke shtyrë edhe gardistin.
Ndërsa për 4 deputetët e tjerë, për të cilët PS, kërkoi masë disiplinore, Komisioni i Etikës nuk caktoi asnjë ndëshkim pavarësisht se bllokuan disa herë foltoren duke mos lejuar vijimësinë normale të seancës plenare të Kuvendit.
Rithemelimi iu rikthye kaosit në parlament pas rrëzimit të kërkesës së tyre për mocion me debat lidhur me investigimin e televizionit italian “Rai 3” ku shfaqej edhe ish zv.kryeministri në arrati Arben Ahmetaj i cili akuzonte kreun e qeverisë, Edi Ramën për lidhje me krerë të krimit të organizuar. Krahas seancës plenare u zhvillua edhe një protestë e mbështetësve të Rithemelimit jashtë Kuvendit ku u dogjën edhe goma dhe pati përplasje mes protestuesve dhe policëve. Versus.al
