Këtë të dielë socialistët rikthehen në punë pas pushimeve. Nesër pritet që të mbahet mbledhja e qeverisë në Dajt, ndërkohë që Kuvendi nis sesionin e ri parlamentar më 2 shtator.
Në mbledhjen e qeverisë, Rama pritet që të ritheksojë prioritetet që duhet të kenë gjatë këtij sesioni të ri parlamentar dhe për nisjen e përgatitjeve lidhur me zgjedhjet e përgjithshme që do të zhvillohen në vitin 2025.
Ndërsa sesioni i ri parlamentar që do të nisë me një drejtim të ri, me Elisa Spiropalin si kryeparlamentare, pritet të ketë çështje me shumë ngarkesë si çështja e Avokatit të Popullit, në postin të cilin qëndron Erinda Ballanca edhe pse i ka përfunduar mandati. Kjo për shkak të mungesës së konsensusit mes palëve.
Çështja më e nxehtë e momentit pritet të jetë ajo e mandatit të Olta Xhaçkës. Më 12 shtator do të mbahet një seancë plenare në Kuvend ku do të shqyrtohet për të disatën herë urdhri i Gjykatës Kushtetuese që i kërkon Kuvendit që t’ja dërgoj për shqyrtim vlefshmërinë e mandatit të Xhaçkës e cila akuzohet nga opozita se është në konflikt interesi për shkak se bashkëshorti i saj u shpall investitor strategjik nga Rama.
Sesioni i ri parlamentar e gjen vendin me ndryshime në qeveri të cilat u lajmëruan nga Rama në Kongresin që PS mbajti në fund të korrikut. Ministrat e rinj, u cilësuan nga opozita si “kukulla” të Ramës pa asnjë profil politik që do t’i shërbejnë kryeministrit për të vendosur mbi gjithçka. Versus.al
