Ngjarja e ndodhur pasditen e djeshme në Tiranë ku një 14 vjeçar u vra me thikë nga bashkëmoshatari i tij, ishte sot temë diskutimi në Kuvend ku deputetja demokrate Ina Zhupa kërkoi sërish dorëheqjen e ministres së Arsimit Ogerta Manastirliu.
Ajo kërkoi që ministrja të mbajë përgjegjësi për ngjarjen, ndërsa e cilësoi “dështim” paketën e sigurisë në shkolla të marrë si iniciativë nga Taulant Balla kur ishte ministër i Brendshëm.
Ky i fundit mori fjalën pas Zhupës dhe kërkoi që ngjarja të mos përdoret për politikë. Ai tha se duhet të ketë një bashkëpunim mes opozitës dhe qeverisë për të rritur nivelin e ndëshkimit për ngjarjet që ndodhin pranë shkollave.
"Na ka prekur tëgjithëve dhe ngushëllimet më të ndjera familjes Cani. Është përgjegjësi që na takon të gjithëve dhe kjo bëhet më e madhe kur ngjarje kaq të rënda keqpërdoren për debatin politik të ditës. Unë e kam bindje se na duhet një qasje krejt tjetër sa i takon luftës kundër keqpërdorimit të rrjeteve sociale sepse sot kemi nevojë për tu bashkuar me njëri tjetrin që të kalohen ligje që dyfishojnë ndëshkimin penal”- u shpreh Balla ndër të tjera.
Fjala e ministrit të Shtetit për marrëdhëniet me Parlamentin, solli reagimin e deputetit demokrat Dashnor Sula i cili akuzoi qeverinë për masakrën e ndodhur në Shkodër më 30 tetor ku mbetën të vdekur 4 persona.
“Hipokrizia juaj nuk ka fund. Përpara dy javësh u vranë 4 qyetarë në mes të Shkodrës nga banda juaj. A u kujtu ndonjëri prej jush të bëjë ndonjë ngushëllim për anëtarët e familjarëve të viktimave?”- tha Sula. Versus.al
