New York- Kryeministri Edi Rama u taku me presidentin turk Rexhep Tajip Erdogan gjatë ditës së djeshme teksa të dy liderët ndodhen në SHBA për samitin e OKB-së. Mediat turke kanë zbardhur detaje nga takimi me dyer të mbyllura mes Ramës dhe Erdogan që u mbajt në Turkevi (Shtëpia Turke), qendra diplomatike e Turqisë në Nju Jork.
Mësohet se Erdogan ka deklaruar se do të vazhdojnë përpjekjet për zhvillimin e mëtejshëm të marrëdhënieve dypalëshe mes vendeve në të gjitha fushat.
Pjesë e diskutimit ishte edhe lufta në Gaza, për të cilën Erdogan u shpreh se Izraeli po kryen masakra që dëmtojnë paqen rajonale dhe globale, ndërsa bëri thirrje për unitet dhe veprime të përbashkëta për të ndalur Izraelin.
Ditën e djeshme, kryeministri Edi Rama mbajti fjalën e tij në samitin e OKB-së ku foli për pasiguritë e shtuara në botë dhe cënimin e paqes. Duke parashtruar këtë retorikë pasigurie, Rama përmendi edhe idenë për krijimin e shtetit të “Urdhri i Bektashi” brenda Tiranës, teksa e cilësoi si hap për promovimin e tolerancës dhe paqes ndërfetare në botë. Versus.al
