Ish-oligarku moldav Vladimir Plahotniuc është dënuar me 19 vite burg për përfshirjen në një nga skandalet më të mëdha financiare në historinë e Moldavisë, të njohur si “vjedhja e shekullit”.
Plahotniuc, dikur biznesmeni më i pasur dhe një figurë kyçe politike në vend, u shpall fajtor për mashtrim bankar dhe përfitim të paligjshëm nga një skemë që tronditi ekonominë kombëtare. Ai nuk ishte i pranishëm në sallën e gjyqit dhe ka mohuar të gjitha akuzat, ndërsa avokati i tij ka deklaruar se do të apelojë vendimin.
Skandali daton në vitin 2014, kur rreth 1 miliard dollarë u transferuan brenda dy ditësh nga bankat moldave drejt kompanive offshore me pronësi të paqartë në Britani dhe Hong Kong. Qeveria u detyrua të ndërhyjë për të shpëtuar sistemin bankar, duke krijuar një gropë financiare që arrinte në një të tetën e Prodhimit të Brendshëm Bruto të vendit.
Hetimet zbuluan se një pjesë e konsiderueshme e fondeve përfundoi në kompani të lidhura me oligarkun pro-rus Ilan Shor, i cili konsiderohet si një nga figurat kyçe të skemës.
Fillimisht, Plahotniuc nuk u akuzua drejtpërdrejt, por në vitin 2019, mes akuzave për korrupsion dhe pas humbjes së pushtetit nga partia e tij, ai u largua nga Moldavia. Në korrik të vitit 2025, ai u arrestua në Athens teksa tentonte të udhëtonte drejt Dubait dhe më pas u ekstradua në vendin e tij.
Prokuroria pretendon se Plahotniuc ka përfituar personalisht mbi 40 milionë dollarë nga skema dhe gjykata ka urdhëruar që ai të paguajë rreth 60 milionë dollarë si dëmshpërblim ndaj shtetit. Sipas hetimeve, fondet janë përdorur për blerjen e një avioni privat të tipit Embraer Legacy 650, prona të paluajtshme, si dhe për shpenzime personale dhe investime.
Autoritetet deklarojnë se ai ka shfrytëzuar ndikimin e tij politik dhe ekonomik për të ndërtuar një rrjet kompleks që synonte përfitime të paligjshme, duke përfshirë edhe manipulimin e sistemit bankar përmes bashkëpunëtorëve.
Ndaj Plahotniuc vijojnë edhe çështje të tjera penale në Moldavi, ndërsa ai vazhdon të mohojë çdo përfshirje në aktivitetet kriminale.
