Policia ka arrestuar dje Mareglen Tomorin, drejtor i Organizatës Ndërkombëtare të Policisë (IPO), një OJQ me status këshillimor, pasi dyshohet se ka ushtruar dhunë fizike ndaj bashkëjetueses së tij, Alma Bime, e cila mban postin e drejtoreshës së Politikave të Migracionit, Azilit dhe Antitrafikut në ministrinë e Brendshme.
“Specialistët për Hetimin e Krimeve të Komisariatit të Policisë Nr. 3:
-arrestuan shtetasin M. T., 41 vjeç, pasi dyshohet se ka ushtruar dhunë fizike ndaj bashkëjetueses së tij”,- njoftuan blutë.
Lidhur me këtë ngjarje, policia reagoi edhe ditën e sotme, duke përgënjeshtruar pretendimet e disa mediave se rasti nuk u raportua për publikun.
“Në lidhje me një lajm të publikuar në rrjetet sociale, ku pretendohet se është mbajtur e fshehtë nga ana e Policisë arrestimi i shtetasit M. T., ju informojmë se:
Më datë 16.09.2025, në përmbledhjen ditore ndodhet njoftimi i dhënë për media, i cili gjithashtu është pasqyruar në faqen zyrtare të Drejtorisë Vendore të Policisë Tiranë”,- njoftoi sot policia.
