Tropojë- Një konflikt për motive të dobëta brenda një lokali në Breg-Lumë përfundoi në tragjedi ditën e djeshme. Pas sherrit me thika mes disa personave, mbeti i vdekur 24 vjeçari Adrian Pepkolaj i cili u dërgua në spital por nuk mundi t’u mbijetonte plagëve të marra.
Ndërsa i plagosur mbeti vëllai i tij Valentin Pepkolaj 32 vjeç dhe miku i tij Shkëlzen Kukaj 45 vjeç.
Për ngjarjen e ndodhur rreth orës 17:00, u shpall në kërkim 40 vjeçari Saimir Sadiku i cili dyshohet se vrau të riun dhe plagosi edhe dy të tjerët. Ndërkohë, policia arrestoi 5 persona, shokë të autorit të ngjarjes të cilët akuzohen për përkrahjen e tij dhe moskallëzimin e ngjarjes së rëndë.
Në pranga kanë rënë:
-Andrin Qehaja, 39 vjeç, për veprat penale “Përkrahja e autorit të krimit” dhe “Moskallëzimi i krimit”;
-Xhevolin Macaj, 31 vjeç, për veprat penale “Veprime që pengojnë zbulimin e së vërtetës” dhe “Moskallëzimi i krimit”;
-Altin Shpendi, 34 vjeç, për veprën penale “Moskallëzimi i krimit”;
-Anton Boçi, 29 vjeç, për veprën penale “Moskallëzimi i krimit”;
-Jetmir Kuraj, 34 vjeç, për veprën penale “Moskallëzimi i krimit”
Ndërkohë, dy të plagosurit ndodhen në spital ku po marrin ndihmën e nevojshme mjekësore. Versus.al
