Një ngjarje e dhunshme e lidhur me drogën shkaktoi panik mbrëmjen e 10 majit në parkingun e Penny Market në Via San Severo, ku dy persona u plagosën para syve të familjeve dhe fëmijëve. Një tetëmbëdhjetëvjeçar dhe një grua mbetën të lënduar gjatë incidentit.
Mediat lokale shkruajnë se, autoritetet, duke përfshirë karabinierët, zyrën e prokurorit dhe gjyqtarin hetues, raportuan se shkaku i të shtënave ishte një borxh i papaguar droge.
Të arrestuarit janë dy burra: Erjon Rameta, 37 vjeç, i njohur si “Antonio Shqiptari”, dhe Paolo Basto, banor i Foggias. Ata dyshohet se tentuan një sulm ndëshkues me armë zjarri.
Sipas hetimeve, të dy mbërritën të armatosur në parking dhe u afruan ndaj të pranishmëve. Rameta thuhet se u tha: “Unë bëj paqe vetëm me armë”, ndërsa Basto paralajmëroi: “Mos lëvizni, përndryshe do t’ju qëlloj.”
Njëri nga rumunët e pranishëm, duke besuar se armët ishin joreale, iu afrua, duke shkaktuar të shtënat që plagosën Deremona Tanasie, 35 vjeç, në këmbë, dhe Adrian Gheorghe Matei, 18 vjeç, në kofshë.
Karabinierët, të alarmuar nga një telefonatë për kërcënime me vdekje, mbërritën menjëherë në vendngjarje. Ata ndaluan Baston dhe më vonë Rametën, duke sekuestruar dy pistoleta me numra serialë të fshirë, gëzhoja dhe disa shkopinj që ishin përdorur gjatë përleshjes.
Gjatë marrjes në pyetje, Rameta pranoi të kishte qëlluar, por pretendoi se kishte qëlluar vetëm për t’u mbrojtur nga sulmi i rumunëve të armatosur me shkopinj, ndërsa Basto mohoi të ishte i armatosur dhe tha se ishte viktimë e një sulmi brutal. Të dy kishin mavijosje që kërkuan trajtim mjekësor para arrestimit.
Megjithatë, gjyqtari hetues vendosi se versioni i qytetarëve rumunë ishte më i besueshëm dhe konfirmoi se të dy të arrestuarit kishin ndërmarrë një sulm të qëllimshëm për të ndëshkuar një debitor dhe babain e tij. Prania e grave dhe fëmijëve në vendngjarje përforcoi konkluzionin se nuk mund të kishte pasur një kurth nga rumunët. Për këtë arsye, paraburgimi i tyre u konfirmua.
Të dy të arrestuarit kanë një histori kriminale të gjatë. Paolo Basto ishte dënuar më parë me 15 vjet burg për bashkëpunim në vrasjen e Francesco Cannone, 22 vjeçar nga Foggia, në 2011. Erjon Rameta ishte arrestuar në vitin 2020 për dy sulme të lidhura me mafian dhe u lirua në fillim të vitit 2025, për t’u arrestuar më pas përsëri për posedim të paligjshëm armësh.
