Londër – Mbretëria e Bashkuar ka prezantuar regjimin e parë të këtij lloji në botë, që synon goditjen direkte të rrjeteve kriminale që ndihmojnë dhe përfitojnë nga migrimi i parregullt drejt territorit britanik. Duke nisur nga dita e nesërme, çdo individ apo organizatë e përfshirë në kontrabandimin e njerëzve drejt MB-së mund të përballet me sanksione të ashpra financiare dhe ligjore.
Regjimi i ri i sanksioneve, i njoftuar nga Ministri i Jashtëm më 22 korrik, parashikon ngrirjen e aseteve, ndalimin e udhëtimit në Mbretërinë e Bashkuar dhe përjashtimin nga sistemi financiar britanik për personat dhe grupet e identifikuara si pjesë e këtyre rrjeteve.
Sipas FCDO (Foreign, Commonwealth & Development Office), sanksionet e para do të aplikohen më 23 korrik, ndaj një grupi të përzgjedhur objektivash – që përfshijnë drejtues bandash, financues, furnitorë të pajisjeve për kalime të paligjshme, shitës të pasaportave të falsifikuara dhe përdorues të sistemeve të pagesave alternative si “Hawala”.
Ky mekanizëm është pjesë e “Planit për Ndryshim” të qeverisë britanike, dhe përbën një përpjekje të drejtpërdrejtë për të çrrënjosur kontrabandën njerëzore si një nga burimet kryesore të migracionit të paligjshëm drejt MB-së.
Synimi është të ndërpritet rrjeti i financimit dhe logjistikës që ushqen këto operacione kriminale, përfshirë mjetet lundruese që përdoren për kalimin e Kanalit.
Autoritetet britanike paralajmërojnë se emigrantët që i paguajnë kontrabandistët për kalim, shpesh përfundojnë të trafikuar, në kushte të ngjashme me skllavërinë moderne, apo përballen me rrezikun e vdekjes në det.
Regjimi i ri do të mbështetet edhe nga dispozita të reja ligjore që pritet të hyjnë në fuqi përmes Projektligjit për Kufijtë, Sigurinë, Azilin dhe Emigracionin, duke i dhënë autoriteteve mjetet më të plota për të ndërhyrë edhe në rastet ku metodat tradicionale penale nuk mjaftojnë.
FCDO ka bashkëpunuar ngushtë me Agjencinë Kombëtare të Krimit, Komandën për Sigurinë Kufitare dhe partnerë ndërkombëtarë, për të identifikuar individët me ndikim të lartë në rrjetet e kontrabandës dhe për t’i sanksionuar publikisht, duke i ndaluar në mënyrë të prerë nga çdo bashkëpunim me institucionet financiare të Mbretërisë së Bashkuar.
“Për shumë kohë, bandat kriminale kanë mbushur xhepat e tyre të korruptuar dhe kanë shfrytëzuar shpresat e njerëzve vulnerabël pa u ndëshkuar, ndërsa nxisin migrimin e parregullt drejt MB-së. Ne nuk do ta pranojmë këtë gjendje. Është detyra jonë morale dhe pjesë kyçe e Planit për Ndryshim të bëjmë gjithçka që mundemi për të shkatërruar këto banda dhe për të siguruar kufijtë e Britanisë.
Për këtë arsye, Mbretëria e Bashkuar ka krijuar regjimin e parë në botë të sanksioneve kundër bandave të përfshira në kontrabandimin e njerëzve dhe nxitjen e migrimit të parregullt, si dhe mundësuesve të tyre. Nga dita e nesërme, personat e përfshirë do të përballen me ngrirje të aseteve, përjashtim nga sistemi financiar britanik dhe ndalim udhëtimi drejt MB-së.” u shpreh ministri i jashtëm David Lammy./Versus.al
