Në kuadër të vizitës në Shqipëri, të Presidentit të Turqisë, Recep Tayyip Erdoğan, Policia ka ndërmarrë disa masa, mes të cilave edhe bllokimi i disa rrugëve në kryeqytet.
Për pasojë, bëhet e ditur se do të ketë bllokime të disa segmenteve rrugore, si dhe bllokime të pjesshme të disa segmenteve të tjera, në varësi të takimeve dhe aktiviteteve që do të zhvillohen gjatë vizitës, në Tiranë.
Referuar njoftimit, drejtuesit e automjeteve të shfrytëzojnë autostradën e re Kashar - Rinas, për të qarkulluar në drejtim të aeroportit të Rinasit, pasi aksi i vjetër Kashar - Rinas nga ora 10:00 deri në 11:30, si dhe nga ora 17:00, deri në orën 18:00, të datës, 10.10.2024, do të jetë i bllokuar.
Rrugë të tjera që do të bllokohen janë: Nga Rinasi - Qafa e Kasharit - Mbikalimi tek Casa Italia - nënkalimi te ish-sheshi “Shqiponja”, Unazë (Astir) - Rrethrrotullimi i Saukut, Rruga e Elbasanit. Bulevardi “Dëshmorët e Kombit”, nga Ura te ish Hotel Dajtit deri te sheshi “Nënë Tereza”, rruga “Ismail Qemali”, rruga “Papa Gjon Pali II”, rruga “Ibrahim Rugova” rruga “Ukraina e Lirë”, bulevardi "Zhan D'Ark" dhe rruga "Xhorxh Bush".
Agjenda
Erdogan do të mbërrijë në Tiranë rreth orës 11:30 dhe do të pritet me ceremoni zyrtare nga homologu i tij shqiptar, Bajram Begaj. Më pas, rreth orës 13:40 bëhet ceremonia e firmosjes së marrëveshjeve dhe në fund do të ketë një deklaratë për shtyp me kryeministrin Edi Rama. Në përfundim të deklaratës, në orën 16:30-17:30 do zhvillohet ceremonia e inaugurimit të Xhamisë së Namazgjasë.
Ndonëse kjo xhami duhet të hapte dyert për besimtarët dhe të thirret ezani i parë që në vitin 2018, tre vite pas nisjes së punimeve, nuk u realizua për shkak të përplasjeve mes komunitetit mysliman në Turqi dhe atij në Shqipëri, të akuzuar si gylenistë, kundërshtarët më të fortë të Erdogan, të cilët ky i fundit i ka akuzuar edhe për grusht shteti në 2016-ën
