Deputeti socialist Erion Braçe nuk ndalet në denoncimin ndaj skemave piramidale online që po zhvasin qytetarët shqiptarët.
Përmes një videoje të publikuar në rrjetet sociale, Braçe paralajmëron sidomos qytetarët e Divjakës dhe Lushnjës të bëjnë kujdes ndaj këtyre skemave, teksa ka publikuar edhe një mesazh të udhëheqësve të këtyre skemave.
“Ky është Leo Smith, profesori që ka zhytur në piramidë Divjakën e Lushnjën, edhe më gjerë. Është një situatë surreale në çdo klub, kafene, restorant, berberhane grash e burrash, shtëpi në Divjakë e Lushnjë. Fëmijë, të rinj, të rritur, të moshuar që rrinë në telefon në dorë e presin sinjal nga profesori Leo Smith. Tmerr! Leo Smith nuk ekziston, është robot, ndryshe nga Joana”, shkruan Braçe krahas videos.
Sakaq, Braçe ngre edhe pyetjen se si njerëzit mund të mashtrohen nga një robot.
“Ndërkohë dje, Autoriteti i Mbikëqyrjes Financiare njoftoi se nuk ka licensuar apo lejuar asnjë kompani që operon shërbime investimi në Shqipëri.
Pra, platforma si TXEX, XUEXA dhe GROKR janë të paligjshme në territorin e vendit tonë!
Autoriteti njoftoi gjithashtu se këto platforma përdorin mekanizma krejtësisht fiktivë për sinjale blerjeje të kripto-aseve, të cilat nuk pasqyrojnë veprime reale të kryera.
Pra, bëhet fjalë për mastrim: po ju mashtrojnë dhe po ju grabisin!
Ky paralajmërim i drejtohet veçanërisht personave të arsimuar – inxhinierë, juristë, ekonomistë në Divjakë dhe Lushnje – të cilët pyeten: si mund t’ju mashtrojë një robot dhe disa persona të tjerë? Si mundet kjo?
Ndërkohë, për agjentët që po ushtrojnë kërcënim dhe shantazh ndaj viktimave, ju kujtohet se veprimet tuaja janë individualizuar dhe përbëjnë krim, siç bënin menaxherët e Rrapush Xhaferrit në vitet 1996-1997.
Pyesni prindërit tuaj, sepse fundin do ta shihni shumë shpejt! përfundon Braçe./Versus.al
