Më 12 nëntor 2025, Europol mbështeti një hetim të udhëhequr nga Gjermania, i cili synonte një grup mercenarësh të punësuar nga një rrjet kriminal për të rrëmbyer kreun e një bande rivale të trafikut të drogës shqiptare. Operacioni përfshiu autoritete ligjzbatuese nga Danimarka, Franca, Letonia dhe Mbretëria e Bashkuar.
Veprimet u fokusuan tek shtetas letonez, disa prej të cilëve me përvojë në Legionin e Huaj Francez, të trajnuar profesionalisht dhe të pajisur me mjete speciale. Ata ishin të angazhuar për të rrëmbyer kreun e një rrjeti shqiptar të trafikut të drogës, i cili dyshohet se kishte organizuar vjedhjen e disa tonëve kanabis me vlerë miliona eurosh.
Gjatë ditës së operacionit, katër persona u arrestuan në Danimarkë, Francë, Letoni dhe Mbretërinë e Bashkuar, ndërsa dy të tjerët, që ishin arrestuar më parë në tetor 2014 në Gjermani, tashmë ishin dënuar nga gjykata. Europol luajti një rol kyç duke lehtësuar shkëmbimin e informacionit, koordinimin operativ dhe ofrimin e mbështetjes analitike, duke dërguar ekspertë në Nisë, Francë, për të siguruar ndërlidhje në kohë reale dhe për të dhënë udhëzime të menjëhershme për hetuesit në terren.
Ky operacion lidhet me fenomenin e njohur si “Violence-as-a-Service”, ku individë të trajnuar ofrojnë shërbimet e tyre për kryerjen e veprimeve të dhunshme për llogari të grupeve kriminale. Në këtë rast, specialistë të trajnuar, përfshirë ish-ushtarë të Legionit të Huaj Francez, janë angazhuar për të kryer akte dhune për organizata kriminale, duke treguar një rritje të këtij fenomeni në Evropë, veçanërisht pas luftës në Ukrainë./Versus.al
