Komisioni Qendror i Zgjedhjeve (KQZ) ka miratuar fletën e votimit që do të përdoret në zgjedhjet parlamentare të 11 majit, të cilat do të mbahen brenda dhe jashtë vendit.
Një nga veçoritë më të dukshme të kësaj flete është madhësia e saj e konsiderueshme, me përmasa 58,3 cm me 29,7 cm, e njëjtë për të gjitha qarqet zgjedhore. Kjo madhësi është e nevojshme për të përmbajtur numrin e lartë të kandidatëve nga 11 subjekte zgjedhore, ku vetëm në Tiranë janë regjistruar 539 emra që garojnë për një vend në Kuvend.
Ilirjan Celibashi, kreu i KQZ-së, ka shprehur qartë se, megjithëse emrat në fletën e votimit janë të lexueshëm, do të ishte më mirë nëse do të ishin pak më të mëdhenj. Sidoqoftë, ai theksoi se rritja e madhësisë së fontit do të kishte si pasojë një rritje të madhësisë fizike të fletës së votimit, gjë që mund të krijonte vështirësi praktike.
“Fleta e votimit është e njëjtë në madhësi për të gjitha qarqet. Në Tiranë, dendësia e emrave është më e madhe, por të gjithë janë të lexueshëm. Sigurisht, një font më i madh do të ishte më i përshtatshëm, por duke marrë parasysh balancën midis madhësisë së fletës dhe leximit të kandidatëve, ne kemi arritur një zgjidhje të përshtatshme”, u shpreh Celibashi.
Fletët e votimit do të prodhohen nga kompania sllovene “Cetis” dhe do të shpërndahen në të gjitha qarqet zgjedhore, duke përfshirë edhe diasporën, e cila do të marrë pjesë në votim për herë të parë.
Shpërndarja e fletëve të votimit për qytetarët jashtë vendit do të fillojë në 10 ditët e para të prillit, duke siguruar që të gjithë të kenë mundësinë të marrin pjesë në procesin demokratik./Versus.al
Fletët e votimit për 12 qarqet:
