Shqipëria do të lejojë shtetasit e Bashkimit Europian që të qëndrojnë në Shqipëri më shumë se tre muaj pa leje qëndrimi apo ndonjë leje tjetër unike.
Ministria e Brendshme e ka propozuar këtë ide si një risi të ligjit për të huajt, i cili është hedhur së fundmi edhe për konsultim publik.
Që një shtetas i huaj të qëndrojë në Shqipëri pa leje qëndrimi duhet të plotësojë një nga kriteret e mëposhtme si:
-të jetë i punësuar ose i vetëpunësuar;
-të ketë burime të mjaftueshme financiare për veten dhe anëtarët e familjes që të mos bëhen barrë për sistemin e ndihmës sociale si dhe të kenë policë të sigurimit shëndetësor në Republikën e Shqipërisë;
Nga ky lehtësim do të përfitojnë edhe personat, të cilët vndosin të kryejnë një kurs studimi në vendin tonë.
“Propozimi për përjashtimin e tyre nga ky detyrim është në linjë edhe me rekomandimet e lëna në Raportin e Komisionit Evropian për vitin 2023.
Shtetasit e vendeve të Bashkimit Evropian, për periudha qëndrimi më të gjata se tre muaj, kanë detyrimin të regjistrohen pranë zyrës së gjendjes civile, në territorin e së cilës kanë vendqëndrimin, jo më vonë se tre muaj nga data e mbërritjes. Zyra e gjendjes civile i pajis ata me një certifikatë regjistrimi”, bëjnë me dije autoritetet.
Pa leje qëndrimi mund të banojnë në Shqipëri për më shumë se tre muaj edhe anëtarët e familjarit që po qëndron në vendin tonë duke plotësuar një nga kushtet e mësipërme.
Shtetasit e Bashkimit Evropian që kanë banuar ligjërisht për një periudhë të vazhdueshme prej pesë vjetësh në Republikën e Shqipërisë kanë të drejtën e qëndrimit të përhershëm.
Sipas censit të vitit 2023, në Shqipëri jetojnë rreth 15 mijë banorë me shtetësi të huaj./ Versus.al
