Fatjon Bici, 15 vjeç u vra me thikë gjatë një sherri të ndodhur më 16 maj të vitit të kaluar në Gramsh pranë shkollës “Asllan Shahini”. Krimi ndodhi pasi i mituri ishte përfshirë për të ndihmuar kushëririn e tij Marko Lici i cili ishte konfliktuar me tre persona të tjerë.
Ky i fundit i cili asokohe mbeti i plagosur, gjatë një interviste për Euronews Albania ka folur për vështirësitë që po kalon që prej ngjarjes së rëndë duke u shprehur se njerëzit e shohin keq në rrugë.
Adoleshenti rrëfeu edhe njëherë ngjarjen duke sqaruar se as ai dhe as kushëriri i tij i ndjerë nuk kishin pasur në plan të konfliktoheshin me autorët.
“Ishim te shkolla si çdo herë me kushëririn tim. Shkonim dhe vinim për shpi bashkë dhe një ditë Qetsor Hysa na thirri për sherr. S’doja që të shkoja, unë po lozja top dhe vjen një çun i vogël dhe më njofton që ke kushëririn atje. Unë e lash lojën, shkova atje. Pyeta se çfarë ka ndodhur.
Ishte dhe një çun tjetër që ishte ulur në një stol me matanesh dhe e pyeta për çfarë ke ardhur. Më tha se do takonte kushëririn tim. E pyeta nëse ke ardhur për sherr, jo më tha. Kushëririt i thashë hajde se do ikim në shtëpi, më tha prit dhe pak.
Ndejtëm dhe pak, ndërkohë erdhën dhe tre shokë të tjerë të çunit që ishte vetëm. Pastaj filluan me ofendime, nxorën thika dhe doreza. Ne s’kishim asgjë me vete sepse nuk ishim nsiur për sherr. Ofenduan kushëririn dhe ai gjuajti me thikë. Ne nuk kishim konflikte të mëparshme me kushëririn, i thoshim mos të zihej”- tha Marko Lici.
Ai tha se kërkon vetëm që të ecë në rrugë lirshëm pa u drejtuar me gisht nga të tjerët.
“Sot kërkoj të drejtën time, mos të dal në rrugë dhe të tjerët të më hedhin llafe. Dua të jem i qetë me familjen time siç kam qenë gjithmonë. S’dua të dal në rrugë të më thonë: Ky e la kushëririn në baltë”, u shpreh adoleshenti. Versus.al
