Ditën e djeshme, familjarë e miq u mblodhën në përkujtim të Artan Lames, publicistit dhe studiuesit i cili ndërroi jetë një vit më parë pas një ndërhyrje kirurgjikale në zemër.
-
Shqipëria që shihte Tan Lamja
21 Maj, 13:46
Në këtë ceremoni përkujtimore u prezantua edhe libri i tij “Shqipni e harrume”, një vepër që përmbledh pasionin e tij të pandalshëm për historinë dhe kujtesën shqiptare. Vajza e tij, Lisia e cila është kthyer në Shqipëri për të vendosur në vend “gurët” që nisi të lëvizte i ati, kërkoi që Lame të kujtohet për atë që ishte, njeri plot projekte dhe pasion të rrallë për historinë.
“Dua që ta kujtoni Tanin për atë që ishte, jo me keqardhje”, u shpreh ajo, duke sjellë edhe copëza nga jeta e tyre, shtëpinë si një hapësirë muzeale ku çdo objekt kishte një histori më vete, si pjesë e një bote që ai e kishte ndërtuar me kujdes dhe dashuri.
Ajo u ndal po ashtu edhe te projekti “Muzeu i Gardës”, i cili fatkeqësisht nuk arriti të përfundonte në kohë, pavarësisht ndihmës së madhe të miqve dhe shokëve të Tanit, të cilët i kishte të shumtë. Por, ashtu sikurse ai ishte një njeri “plot ngjyra”, nuk e patën të vështirë për të përmbushur një tjetër amanet të tijin, pikërisht librin “Shqipni e harrume”.
“Ndjej që edhe pse isha unë iniciatorja e përfundimit të muzeut ishte Tani nëpërmjet meje, i cili i thërriti të gjithë ata që kontribuuan. Por njëvjetori nuk mund të qëndronte vetëm me një projekt të ndërprerë në finishin e vet, ka shumë për të thënë, ndaj ne pamë armën tjetër të tij të fortë publicistikën e cila në një temë me muzeun sërish thërret te historia shqiptare”, tha Lisia ndër të tjera.
“Është një nder dhe mallkim që të kesh një standard kaq të lartë për të arritur”, e përmbylli ajo fjalën e saj, duke e thënë qartë se i ati mbetet shembulli i një njeriu të rrallë, i plotësuar në dije, pasion dhe mënyrën si e jetoi jetën.
Ndërsa miku i Lames, Artan Shkreli foli për rrugëtimin e përbashkët, ndërsa vlerësoi se “shtegu i trajektoreve që ai ndiqte, ndonëse oblike, kishte një qartësi kritike unikale”.
“Në qasjen ndaj përshfaqjeve të jetës së shqiptarëve, përmes fotografive, Lame na shoqëron në disa nga faqet më të mugëta e më sublime të historisë së vendit: krijon një kronikë personazhesh dhe atmosferash që duken të largëta nga jeta jonë e përditshme, por që në realitet u japin thellësi shumë ngjarjeve aktuale”, vlerësoi Shkreli.
Sipas tij, “libri shfaqet si një kalesë nëpër dritat dhe hijet e principatës dhe të republikës sonë, por pa pretenduar të jetë shterues ose ‘krejt’ objektiv; një vështrim mbi shqiptarët e djeshëm që flet shumë për paqartësitë dhe ndërliqjet e shqiptarëve të sotëm”.
“Libri i Lames priret të shpërbëjë rrëfimin tradicional dhe shpesh heroik të historisë së Shqipërisë, duke ofruar në fakt një “kundërhistori” ku theksi vihet mbi kontradiktat, mitet dhe zonat gri të së kaluarës”, u shpreh Shkreli ndër të tjera. Versus.al
