Punonjësi i Inspektoratit të Mbrojtjes së Territorit (IMT) në Tiranë, Klajdi Zhilla, i cili ishte në kërkim për marrje ryshfeti lidhur me mosheqjen e tendës së një lokali në Kombinat, është vetëdorëzuar në polici.
Zhilla akuzohet për korrupsion pasiv ndërsa në dëshminë paraprake ka pretenduar se nuk e dinte që ishte në kërkim dhe e ka mësuar nga mediat.
Ndërsa inspektorët e tjerë të IMT-së, të arrestuar për këtë çështje, do të paraqiten sot në orën 10:00 para Gjykatës së Posaçme kundër Korrupsionit dhe Krimit të Organizuar (GJKKO) për njohjen me masën e sigurisë.
Para gjykatës pritet të dalë Geraldo Fuçia, i arrestuar si personi që kërkoi ryshfetin, si dhe një tjetër inspektor, i cili po hetohet në gjendje të lirë.
Të dy, Zhilla dhe Fuçia, akuzohen për korrupsion aktiv dhe shpërdorim detyre.
Punonjësit e IMT-së u kallëzuan nga pronari i lokalit, i cili deklaroi se inspektorët i kishin propozuar një marrëveshje për të mos i prishur tendën, kundrejt pagesës prej 1 mijë eurosh. Policia, me miratimin e SPAK-ut, nisi përgjimet dhe më pas simuloi dorëzimin e parave.
Gjatë dorëzimit të shumës, tre kolegë të tjerë të Zhilla-s prisnin brenda një lokali tjetër pranë vendit të ngjarjes.
Policia ndërhyri menjëherë dhe inspektorët tentuan të fshehnin paratë në një gotë mbi banakun e lokalit.
Zhilla u largua me një automjet tip “Audi”, ndërsa tre të tjerët u ndaluan.
Policia sekuestroi paratë e gjetura në banakun e lokalit, të cilat përputheshin me numrat serialë të kartëmonedhave që iu dhanë kallëzuesit.
Përveç kësaj, u gjetën edhe 3 mijë euro dhe 27 mijë lekë, për të cilat dyshohet se mund t’u jenë marrë subjekteve të tjera në këmbim të mosprishjes së tendave pa leje./Versus.al
