Tiranë- Mjeku Edmond Gashi nën arrest shtëpie për skandalin e Onkologjikut ku u zbulua se nuk ofronte trajtim për qytetarët por i drejtonte në klinikën e tij private “Megis”, është paraqitur sot në SPAK për t’u marrë në pyetje.
Prokuroria e Posaçme bën me dije se mjekët dhe personat e tjerë të përfshirë në skandalin e Onkologjikut, po hetohen lidhur me pasurinë dhe rolin e tyre në mungesën e trajtimit të qytetarëve të sëmurë me kancer.
Sipas dosjes së zbardhur nga Prokuroria e Tiranës e cila më pas ia kaloi SPAK-ut, bëhet fjalë për një neglizhencë deri kriminale sa i takon trajtimit të të sëmurëve me kancer në spitalin e Onkologjikut. Hetimet zbuluan se qytetarëve nuk u jepej mjekimi i nevojshëm dhe as ilaçet që shteti duhet t’ua siguronte falas. Në vend të kësaj të njëjtat ilaçe shiteshin me çmime deri në 1200 euro dhe në disa raste pacientët trajtoheshin edhe për sëmundje të paqena në klinikën e mjekut Edmond Gashi.
Ky i fundit i mohoi akuzat dhe njëjtë bëri edhe mjekja Alketa Pere e cila ishte e punësuar në klinikën e Gashit. Për skandalin nën hetim është edhe ish.zv drejtoresha e QSUT Brikena Qirjazi.
Skandali i mungesës së shërbimit ndaj pacientëve të sëmurë me kancer në spitalin e Onkologjikut, u zbulua në qershor të këtij viti kur prokurori i Tiranës Bledar Valikaj lëshoi disa masa arresti shtëpiak ndaj mjekëve onkolgë, Edmond Gashi dhe Alketa Pere si dhe ndaj ish-zv drejtoreshës së QSUT, Brikena Qiriazi. Gashi akuzohet se nuk u ofronte trajtim pacientëve dhe i drejtonte ata për në klinikën e tij “Megis” ku u merrte shuma të majme parash për operacione të panevojshme dhe ilaçe të cilat shteti duhet t’ua siguronte falas. Bashkëpunëtore e tij në këtë skemë, dyshohet të jetë edhe mjekja Alketa Pere e cila sipas prokurorisë, ishte e punësuar në klinikën private dhe drejtonte pacientët drejt saj duke mos u ofruar shërbim në spitalin publik. Në seancën ku u caktuan masat fillestare të arrestit, mjekët folën për mediat ku mohuan akuzat ndaj tyre, ndërsa mjekja Pere pati edhe kritika për fotot që i kishin publikuar në lajme, duke u shqetësuar më së shumti për këtë fakt sesa për dëmin e shkaktuar ndaj pacientëve të sëmurë me kancer. Versus.al
