Policia e Shtetit u ka bërë thirrje qytetarëve që të tregojnë kujdes të shtuar gjatë fundjavës, kur pritet të ketë rritje të ndjeshme të qarkullimit në rrugë, si dhe reshje shiu në disa zona të vendit, duke shtuar kështu edhe rrezikun për aksidente.
Në një njoftim zyrtar, Policia ka dhënë disa këshilla të rëndësishme për drejtuesit e automjeteve, me qëllim garantimin e sigurisë rrugore dhe parandalimin e ngjarjeve të rënda:
Të respektohen kufijtë e lejuar të shpejtësisë;
Të shmangen akset rrugore ku ka prezencë uji;
Të mos drejtohet mjeti nën ndikimin e alkoolit;
Të përdoret gjithmonë rripi i sigurimit, si nga drejtuesit ashtu edhe nga pasagjerët.
Një vëmendje e veçantë u është kushtuar edhe përdoruesve të monopatinave elektrike, të cilët këshillohen të mbajnë gjithmonë kokore mbrojtëse dhe të veshin jelekë reflektues gjatë orëve të mbrëmjes apo në kushte të dobëta ndriçimi.
Për çdo rast emergjent, qytetarët ftohen të kontaktojnë në numrin e telefonit që Policia ka vënë në dispozicion, në mënyrë që të marrin ndihmën e nevojshme sa më shpejt.
Policia apelon për bashkëpunim dhe përgjegjësi nga të gjithë pjesëmarrësit në trafik, për të garantuar sigurinë dhe shmangien e aksidenteve gjatë kësaj fundjave me rrezik të shtuar. /Versus.al/
