Një ngjarje tronditëse me protagonistin një kopshtar shqiptar, që humbi jetën në një aksident fatal në Greqi, rikthehet në qendër të vëmendjes pas vendimit penal kundër pronarëve të një vile luksoze në Rio, pranë Patras.
Më 10 gusht 2019, në një ditë të nxehtë vere, 55-vjeçari shqiptar u thirr të riparojë një pompë uji në një pus 2.5 metra të thellë të vilës, pa asnjë masë sigurie. Pa maskë, pa ventilim dhe pa asnjë pajisje mbrojtëse, ai ra në kontakt me gazra helmuese që e lanë pa frymë në pak minuta dhe shkaktuan vdekjen e tij të menjëhershme.
Tragjedia u thellua më tej kur djali i tij 35-vjeçar, në përpjekje për të shpëtuar babanë, zbriti në të njëjtën gropë dhe u helmua gjithashtu nga gazrat e rrezikshme. Ai u shpëtua me ndërhyrjen e forcave speciale, por pësoi dëmtime serioze shëndetësore dhe mbeti i shtruar në spital.
Ngjarja u rikthye në vëmëndjen e medias së vendit fqinj për shkak se pronari i vilës, një inxhinier mekanik dhe bashkëshortja e tij, ish-notere, u shpallën përgjegjës për aksidentin dhe u dënuan me dy vjet burg me kusht.
Gjykata civile i detyroi të paguanin 290.000 euro dëmshpërblim për familjen e viktimës, por sipas avokatit të familjes shqiptare, deri sot nuk është dhënë asnjë cent.
“Neglizhenca dhe mungesa totale e masave bazë të sigurisë kanë shkaktuar humbjen e një jete shqiptare dhe vuajtjet e një familjeje që ende kërkon drejtësi,” tha avokati Giorgos Koukoulis për mediat greke.
Që nga momenti i parë, çështja tronditëse, jo vetëm për rrethanat e vdekjes, por edhe për faktin se, siç dëshmuan ekspertët, një punë e tillë duhet të kryhet ekskluzivisht nga ekipe të specializuara me pajisje speciale ventilimi dhe maska respiratore. Asnjë prej këtyre nuk ekzistonte. Mosmarrëveshja ligjore vazhdoi edhe në gjykatat civile, ku çifti i pronarëve - ajo, një ish-notere dhe ai, një inxhinier mekanik - u shpallën përgjegjës të vetëm për aksidentin. Ata u detyruan të paguanin një dëmshpërblim prej 290,000 eurosh për familjen e viktimës. Vendimi penal i Gjykatës së Kundërvajtjeve me Tre Anëtarë erdhi javën e kaluar për të konfirmuar të qartën, se pronarët nuk iu përmbajtën masave të përcaktuara me ligj dhe me neglizhencën e tyre shkaktuan humbjen e një jete.
