Presidenti amerikan Donald Trump ka hedhur akuza të reja ndaj miliarderit dhe filantropit George Soros, si edhe ndaj djalit të tij, Alex Soros, duke i akuzuar për përfshirje në protesta të dhunshme në Shtetet e Bashkuara.
Në një postim në platformën e tij Truth Social, Trump kërkoi që Sorosët të hetohen nën ligjin federal RICO (Racketeer Influenced and Corrupt Organizations Act), i cili përdoret për të ndjekur penalisht individë të dyshuar për përfshirje në organizata kriminale.
“George Soros dhe djali i tij i mrekullueshëm nga e majta radikale duhet të ndiqen penalisht sipas ligjit RICO për mbështetjen e protestave të dhunshme – dhe shumë më tepër,” shkroi Trump.
Ndërsa nuk dha prova konkrete që mbështesin pretendimet e tij, deklaratat e Trump vijnë në një periudhë kur ai po përballet me kritika për ndjekjen penale të disa kundërshtarëve të tij politikë.
Trump gjithashtu e shfrytëzoi rastin për të justifikuar vendimin për të vendosur Trupat e Gardës Kombëtare dhe Marinsat në Los Anxhelos, qytet i udhëhequr nga demokratët, që prej disa javësh përjeton protesta të vazhdueshme.
Më herët, Trump kishte akuzuar George Sorosin se ishte i përfshirë në ngritjen e akuzave penale ndaj tij në vitin 2024, në lidhje me pagesat për të fshehur një marrëdhënie me një aktore filmash për të rritur. Ai pretendonte se Soros kishte ndikuar drejtpërdrejt mbi prokurorin publik që e çoi çështjen në gjykatë.
95-vjeçari George Soros është një figurë e shënjestruar shpesh nga e djathta, si në SHBA ashtu edhe në Evropë, për shkak të mbështetjes së tij për kauza progresiste dhe Partinë Demokratike.
Në vitin 2023, Soros ia dorëzoi drejtimin e fondacionit të tij Open Society Foundations djalit të tij, Alex Soros, i cili njihet si një mbështetës aktiv i Kamala Harris, kundërshtares së Trump në zgjedhjet presidenciale të vitit 2024.
Pak javë para se të largohej nga detyra, ish-Presidenti Joe Biden i akordoi George Sorosit Medaljen Presidenciale të Lirisë, për kontributin e tij në promovimin e demokracisë, të drejtave të njeriut, arsimit dhe drejtësisë sociale në mbarë botën. /Versus.al/
