Gjyqtari Engert Pëllumbi do të shqyrtojë ankimin e bërë nga ish-kryebashkiaku i Durrësit, Vangjush Dako i cili u dënua me 2.8 vite burg për shpërdorim detyre të kryer në bashkëpunim në dy raste.
Ende nuk ka një datë për gjyqin, ndërsa caktimi i Pëllumbit u bë me anë të shortit. Gjyqtari i posaçëm la në fuqi arrestin me burg për kryebashkiakun Erion Veliaj ndërsa njihet për faktin se u bë i pari gjyqtar që dënoi një ish-zyrtar të lartë, ish-ministrin e Brendshëm Saimir Tahiri.
Vendimi për Dakon u dha më 25 nëntor të vitit të kaluar, por më pas shkalla e parë për shkak të tejkalimit të afateve të hetimit, e çoi në arrest shtëpie ku ndodhet edhe aktualisht.
Rasti i parë lidhet me pallatin 11 katësh që sipas SPAK, ndërtimi i bërë në vitin 2011 ishte përtej çdo lloj kriteri teknik dhe në paligjshmëri duke e bërë ndërtesën të rrezikshme për të banuar.
Episodi i dytë ka të bëjë mbi projektin “Promenadë Bregdetare” ku SPAK thekson se është hartuar me një vlerë gati dhjetë herë më shumë se ajo që duhej të llogaritej në bazë të Vendimit të Këshillit të Ministrave, duke i shkaktuar shtetit një dëm prej 18 milionë lekë, për të cilat në fillim bashkia Durrës hapi proces ndaj firmës, por më pas juristi i caktuar nga ish kryebashkiaku u tërhoq nga gjykimi. Bashkia Durrës pavarësisht dëmit të konstatuar edhe nga KLSH kreu likuidimin financiar ndaj subjektit privat.
Fajtorë u deklaruan dhe tre te pandehurit Arsuan Bulku, Fatmir Ejupi dhe Fiqiri Farruki, të akuzuar për falsifikim, të cilët u dënuan përfundimisht me nga 2 vjet burg. Dënimet e tyre u pezulluan dhe u vendosën në shërbim prove për 4 vjet. Versus.al
