Një 30-vjeçar është vënë në pranga nga Policia e Tiranës, pasi u kap në zonën e Kombinatit duke lëvizur me armë zjarri me silenciator, e gatshme për qitje.
I arrestuari është identifikuar si Haxhi Nezaj, i cili, sipas Policisë, kishte ngritur pranë banesës së tij një punishte për prodhimin e silenciatorëve për armë të ndryshme, me qëllim shitjen e tyre tek persona të tjerë.
Gjatë kontrollit fizik dhe në banesë, shërbimet e Policisë sekuestruan një armë zjarri me silenciator, një armë pushkë, municion luftarak, disa doza kokaine dhe sende të tjera të kundërligjshme.
Nezaj dyshohet se ishte i përfshirë në aktivitet kriminal të lidhur me furnizimin e elementëve kriminalë me mjete për kryerjen e veprave penale kundër jetës dhe pronës.
Njoftimi i policisë:
Drejtoria Vendore e Policisë Tiranë
Finalizohet operacioni policor i koduar “Punishtja”.
Lëvizte me armë zjarri me silenciator gati për qitje, kapet në Kombinat dhe vihet në pranga 30-vjeçari.
Zbulohet një punishte në të cilën 30-vjeçari prodhonte silenciator për armë të ndryshme dhe më pas dyshohet se ua shiste personave të ndryshëm për kryerje të krimeve kundër personit dhe pronës.
Sekuestrohen arma e zjarrit me silenciator, një armë zjarri pushkë, municion luftarak, doza kokaine dhe sende të tjera të kundraligjshme.
Si rezultat i administrimit të shpejtë të informacioneve të siguruara në rrugë operative, rreth veprimtarive kriminale të një shtetasi, shërbimet e Komisariatit të Policisë Nr. 6, organizuan dhe finalizuan operacionin policor të koduar “Punishtja”, si rezultat i të cilit u kap dhe u vu në pranga shtetasi H. N., 30 vjeç, banues në Kombinat.
30-vjeçari u kap në flagrancë duke lëvizur në qendër të Kombinatit me armë zjarri me silenciator, gati për qitje.
Gjithashtu, gjatë kontrollit fizik dhe të banesës, shërbimet e Policisë gjetën e sekuestruan armën e zjarrit me silenciator, një armë zjarri pushkë, municion luftarak, doza kokaine dhe sende të tjera të kundraligjshme.
Në vijim të veprimeve, në afërsi të banesës së të arrestuarit, u zbulua një punishte që dyshohet se përdorej nga 30-vjeçari për prodhimin e silenciatorëve për armë të ndryshme dhe më pas dyshohet se ua shiste personave të ndryshëm për kryerje të krimeve kundër personit dhe pronës.
Materialet procedurale iu referuan Prokurorisë, për veprime të mëtejshme./Versus.al
