Një burrë nga Virxhinia është akuzuar për kërcënime me vdekje ndaj Zëvendës Presidentes Kamala Harris dhe është paraqitur në gjykatën federale të hënën.
CNN shkruan se Frank Lucio Carillo bëri disa kërcënime kundër Harris, Presidentit Joe Biden, drejtorit të FBI-së Christopher Ëray, disa zyrtarëve të Arizonës dhe të tjerëve në platformën e mediave sociale të krahut të djathtë Gettr.
Në përgjigje të një thirrjeje, FBI gjeti 4,359 postime nga Carillo që shënjestronin zyrtarë të ndryshëm publikë, përfshirë Harris. Në disa prej postimeve Carrillo kishte kërcënuar në mënyra monstruoze zëvendës presidenten.
"Unë do t'ju pres sytë," shkroi Carillo në një fjalë të mbushur me ofendime ndaj Harris të cilën e ka quajtur me epitete të ashpra duke shtuar “shpresoj që të vuash me një vdekje të ngadaltë dhe të dhimbshme”.
Një numër postimesh të ngjashme citohen në procesverbalet e gjykatës, me kërcënime grafike dhe të detajuara kundër zv.presidentes si dhe të tjerëve, duke përfshirë një postim islamofobik në vitin 2023, kur ai shkroi se njerëzit duhet "të dalin me armë dhe të vrasin të gjithë muslimanët".
Kur agjentët e FBI-së mbërritën për herë të parë në shtëpinë e Carillo-s mbi postimet në mediat sociale, Carillo pyeti nëse ata ishin atje "për postimet në internet" dhe tha: "Unë e postova atë". Carrillo, duke folur me veten e tij, tha gjithashtu, "Unë mendoj se do të më duhet një avokat", sipas dokumenteve të gjykatës.
Agjentët federalë morën dy armë zjarri nga shtëpia e tij, duke përfshirë një pistoletë të blerë në vitin 2023 dhe një pushkë të blerë këtë vit. Versus.al
