Në Spitalin Universitar të Patras, mjekët ndalën në heshtje për të nderuar Spiros, 14-vjeçarin që humbi jetën tragjikisht duke u përpjekur të shpëtonte shokun e tij 12-vjeçar në lumin Arachthos. Ndërkohë, Levian Goga, emigranti shqiptar që u hodh heroikisht në lumë për t’i shpëtuar fëmijët, po merr trajtim në spital pas përpjekjes së tij të guximshme.
Për aktin e tij heroik, autoritetet greke do t’i japin shtetësinë greke nderi — një njohje e vonuar, por e merituar.
Sipas raportimeve të ERT News, para fillimit të procedurës për heqjen e organeve të tij, stafi mjekësor qëndroi në heshtje dhe në nderim pranë tavolinës së operacionit — një akt që pasqyron tronditjen e thellë për humbjen e dy të rinjve, si dhe respektin e madh për prindërit që vendosën të dhurojnë organet e fëmijëve të tyre, duke dhënë shpresë dhe jetë të re për pacientë të tjerë në nevojë.
Procesi i heqjes së organeve të 14-vjeçarit nisi në orët e para të mëngjesit të së dielës dhe përfundoi në mesditë. Veshkat dhe mëlçia e tij u dërguan në spitalet “Laiko” në Athinë dhe “Ippokrateio” në Selanik për transplantim, ndërsa zemra dhe mushkëritë nuk ishin të përshtatshme për transplant. Më vonë u krye edhe heqja e kornesë së syve, të cilët do të shpëtojnë jetë në spitale të ndryshme.
Ndërkohë, procedura e dhurimit të organeve nga trupi i 12-vjeçarit pritet të nisë në orët e para të së hënës.
Ky moment i dhimbshëm dhe i fuqishëm tregon jo vetëm tragjedinë e humbjes, por edhe fuqinë e solidaritetit dhe humanizmit në mes të një tragjedie të madhe.
Heroi shqiptar, Levian Goga
Emigranti shqiptar nga Berati, i cili pa u menduar dy herë u hodh në lumin Arachthos të mërkurën e kaluar për të shpëtuar dy fëmijë të mitur, po përballet tani me probleme të frymëmarrjes dhe ndodhet në spitalin e Artës për ekzaminime të hollësishme.
“Luani i Fshatit” siç e quajnë banorët e Neokorit, nuk është një person që kërkon famë apo lavdërime — përkundrazi, ai nuk kërkoi asnjë “bravo” për veprën e tij heroike. Goga pati një kollë të fortë dhe, sipas rekomandimit të mjekut privat, u dërgua me urgjencë nga ambulanca e EKAB për kontrolle më të thella. Gjendja e tij nuk duket shqetësuese, por ministri i Shëndetësisë, Adonis Georgiadis, ka urdhëruar që ai të trajtohet me prioritet dhe të marrë gjithë kujdesin e nevojshëm.
Për veprën e tij pa frikë dhe pa dyshim, autoritetet greke kanë vendosur t’i japin Goga Levian-it shtetësinë greke nderi — një njohje për shpirtin e tij të guximshëm dhe sakrificën që i dha dy fëmijëve që ndodhen në rrezik.
Historia e Goga-s është ajo e një njeriu të thjeshtë, i cili erdhi në Greqi para 24 vjetësh me shpresën për një jetë më të mirë. Pa asnjë garanci dhe me shumë punë të vështirë, ai krijoi një familje dhe një jetë të qetë në Arta. Deri ditën që u bë hero në mënyrën më të papritur, duke dhënë gjithçka për jetën e dy fëmijëve të vegjël që nuk mundën të përballonin rrjedhën e lumit. Versus.al
