Donald Trump u rizgjodh sot në krye të Shtëpisë së Bardhë duke u bërë presidenti i 47-të i Shteteve të Bashkuara të Amerikës pas një fushate tepër të ashpër përballë demokrates Kamala Harris. Për shumë prej liderëve populistë në botë, ky është një lajm i mirë, por çfarë ndikimesh konkrete pritet të ketë rizgjedhja e Trump në krye të Shtëpisë së Bardhë?
-
Donald Trump rizgjidhet president i SHBA-ve
6 Nëntor, 08:23
Gjatë fushatës së tij, Trump ka bërë disa premtime të guximshme të cilat përveçse politikën e brendshme të SHBA-ve, pritet të ndikojnë edhe politikën e jashtme botërore.
Tërheqja nga NATO dhe Aleancat e tjera Ndërkombëtare
Sipas Trump, duhet që SHBA të rishqyrtojë përfshirjen e saj në Aleancën e Atlantikut të Veriut dhe të zcogëlojë disa prej angazhimeve ndërkombëtare të cilat ai i konsideron si të panevojshme. Trump ka paralajmëruar se SHBA-të mund të tërhiqen nga NATO nëse anëtarët e tjerë nuk pranojnë të paguajnë kuotat e nevojshme të tyre në arkën e përbashkët të Aleancës.
Por a është e mundur një gjë e tillë? Edhe nëse Trump kërkon të dalë nga NATO, do të përballej me kundërshtimin e Kongresit dhe udhëheqësve ushtarakë amerikanë të cilët drejtojnë NATO-n, pasi bëhet fjalë për një aleancë të lidhur me traktat dhe kjo lëvizje do të shihej si një lëvizje që dobëson ndikimin e SHBA në skenën globale.
Zgjerimi i ndërtimit të murit kufitar për të parandaluar emigracionin e paligjshëm
Ndryshe nga Biden i cili zbuti kufizimet për hyrjen e emigrantëve të paligjshëm, Trump ka premtuar në fushatë rikthimin e ligjit të vitit 1798 për dëbimin e emigrantëve pa dokumente të cilët rezultojnë të përfshirë në botën e krimit. Gjithashtu, Trump është treguar i qartë duke theksuar se asnjë emigrant i paligjshëm nuk do të lejohet të hyjë në territorin e SHBA-ve përveçse nëse ndjek një rrugë ligjore.
Përfundimi i luftës Rusi-Ukrainë dhe në Lindjen e Mesme
Ajo çfarë pritet me shumë kureshtje është strategjia që ka Trump për t’i dhënë fund një lufte që zgjat më shumë se 2 vitesh mes Ukrainës dhe Rusisë duke sjellë dhjetëra mijëra të vdekur dhe miliona të zhvendosur. Trump ka deklaruar shpesh herë se nëse zgjidhet sërish në krye të Shtëpisë së Bardhë do t’i japë fund luftës në Ukrainë brenda 24 orësh, pa dhënë detaje mbi strategjinë që planifikon të ndjekë, duke u mjaftuar vetëm me deklaratën se do të ulte në negociata presidentët respektivë, Putin dhe Zelensky deris të gjendej një marrëveshje.
Gjithashtu një tjetër premtim i tij mbi zhvillimet në skenën globale ka qenë dhënia fund e luftës në Lindjen e Mesme ku kaosi i krijuar së fundmi kërcënon përhapjen e një konflikti në shkallë të gjerë duke rrezkuar shumë shtete të tjera. Një qasje tjetër, pritet që Trump të ndjekë në marrëdhëniet me Kinën duke rritur më shumë bashkëpunimet mes dy superfuqive. Versus.al
