Skenarët dhe spekulimet e pabesueshme për motivet e sulmuesit dhe organizatorët e sulmit ndaj Donald Trump dominuan rrjetet sociale pas sulmit të dështuar të Thomas Matthew Crooks.
Plumbat e 20-vjeçarit Thomas Matthew Crooks vranë një person krejtësisht të pafajshëm dhe plagosën dy të tjerë, por për pak e humbën objektivin e atentatit që ishte Donald Trump.
Sidoqoftë, historia u shkrua të shtunën, më 13 korrik 2024 në Butler të Pensilvanisë.
Teori të ndryshme konspirative u nxitën pas atentatit të Donald Trump por deklarata e drejtorit të FBI i hodhi më shumë benzinë zjarrit.
Christopher Wray u pyet gjatë një konference në Kongres nëse Donald Trump u godit nga një plumb ose cifla në vesh.
“Me gjithë respektin e duhur për ish-presidentin Trump, nuk e di,”- tha ai.
Por më poshtë do të gjeni 6 teoritë konspirative që qarkullojnë më së shumti në rrjete sociale.
1. Aspektet psikologjike të Crooks, tradhtarit që kreu atentatin
Enigma më e madhe e gjithë rastit konsiston në mungesën e ndonjë motivi të dukshëm, madje edhe paranojak, të atentatorit të Trump. Hetimet nuk kanë çuar askund, të paktën deri më tani, veçanërisht në lidhje me gjendjen psikologjike dhe ideologjinë të 20-vjeçarit Thomas Matthew Crooks. Një hipotezë që besohet gjërësisht është se Crooks, nuk kishte arsye të vriste presidentin e Shteteve të Bashkuara.
Ky supozim bazohet në faktin se Crooks nuk ishte një fans i madh i asnjë krahu politik, dhe historia e tij e fundit e kërkimit në internet nuk tregon ndonjë lloj obsesioni në mënyrë specifike me Donald Trump.
Ndoshta Trump ishte vetëm objektivi më i përshtatshëm por ndoshta në vend të tij mund të ishte dhe presidenti aktual i SHBA-së, Joe Biden. Sigurisht, ky është vetëm një supozim, një interpretim krejtësisht hipotetik i të dhënave të disponueshme, pafundësisht të vogla që rrethojnë Crooks.
2. Është i gjithë faji i... Ukrainës
Një shpjegim befasues - dhe mjaft arbitrar - për motivet e vrasësit gati të Trump u propozua nga Kryeministri i Hungarisë dhe një admirues i njohur i ish-presidentit amerikan, Viktor Orbán. Sipas mendimit të tij, Trump, ashtu si jo shumë kohë më parë kryeministri i Sllovakisë, Robert Fico, u bë shënjestër e sulmeve vdekjeprurëse "sepse ata janë kundër luftës dhe mbështesin paqen në Ukrainë".
Lideri hungarez shpjegoi më tej se “forcat botërore që janë në favor të luftës janë aq të çoroditura, aq të pamëshirshme dhe aq mirë të organizuara, saqë po përpiqen të pastrojnë forcat paqedashëse nga skena politike”.
Në fakt, vetë Orban ka ndërmarrë iniciativa paqeje për t'i dhënë fund konfliktit ruso-ukrainas dhe ka pasur një takim të përzemërt me Trump, vetëm dy ditë para atentatit ndaj tij. Por në pajtim të plotë me instinktin e tij politik, Orban deklaroi se "për fat të mirë Zoti kishte plane të tjera për Donald Trump". Megjithatë, në thelb, teoria e tij e motivimeve antipacifiste nuk mbështetet nga asnjë provë apo gjetje.
3. "Gjithçka ishte rregulluar, Trump do luante golf të nesërmen"
Nga reagimi i turmës ndaj të shtënave dhe të vrarëve u duk sikur ata prisnin të ndodhte diçka e tillë. Dhe agjentët sekretë të gardës personale të Trump, menjëherë pas sulmit, e lanë të ngrihet në këmbë, me gjoksin e ekspozuar ndaj një goditjeje të re të mundshme, ndërkohë që kjo nuk mund të ndodhë në një atentat.
Për më tepër, vetë Trump u pa të nesërmen duke luajtur golf , pa asnjë shenjë lëndimi në veshin e tij të djathtë ose në ndonjë vend tjetër në trupin e tij. Prandaj, gjithçka tregon se atentati i tij ishte një iluzion optik, një akt mashtrues, i cili u ekzekutua në perfeksion dhe me sukses spektakolar.
Rrëfimi i mëparshëm u riprodhua nga shumë në mediat sociale, pasi ka gjithmonë nga ata që zakonisht preferojnë të besojnë fantazinë e pastër, të cilën e bazojnë në të dhëna empirike sipas dëshirës, madje edhe në lajme të rreme. Duke lënë mënjanë se si mund të vihej në skenë kjo skenë e veçantë, kush do të pranonte të xhironte dhe të xhirohej, për sa i përket plagosjes së Trump, nuk ka dyshim se ishte e vërtetë dhe vetëm rastësisht nuk ishte fatale.
Paraqitja e tij e supozuar në një fushë golfi ka qenë më herët, dhe përveç çdo konfuzioni dhe gabimi, veprimet e truprojave ishin pikërisht ato që parashikojnë protokollet e veprimeve për incidente të ngjashme. Ata e larguan Trumpin e plagosur nga skena e sulmit pasi u përcaktua se ishte e sigurt për të që të largohej, dhe natyrisht turma reagoi natyrshëm: me britma, terror dhe panik.
4. "Urdhër nga Biden dhe shteti"
Një deklaratë e Biden-it për kundërshtarin e tij se "duhet ta vëmë Trumpin në pikëpyetje" u mor nga disa si provë e pakundërshtueshme pas atentatit por jo e mjaftueshme. Natyrisht, linja e tij e diskutimit doli jashtë kontekstit. Biden iu drejtohej donatorëve demokratë, të cilëve u kërkoi të fokusoheshin në trillimet e rrezikshme që Trump po përhap dhe jo në paraqitjen e tij patetike.
Biden kërkoi falje për frazën në fjalë, dënoi sulmin ndaj kundërshtarit të tij, por megjithatë nuk i bindi teoricienët e konspiracionit. Të cilët ende pretendojnë se fajësia morale për atentatin ndaj Trump i takon presidentit dhe shtetit të thellë që i shërben atij.
5. Plumbi e qëlloi në gjoks Trumpin por shpëtoi fal antiplumbit
Disa përdorues të rrjeteve sociale, shumë më të vëmendshëm vunë re një pikë të zezë të rrumbullakët në xhaketën e Trump, në lartësinë e gjoksit dhe në anën e djathtë.
Menjëherë u krijua versioni se në fakt Trump u qëllua në gjoks në vend të veshit, por lëndimi i tij vdekjeprurës u shmang falë jelekut antiplumb, që supozohej të kishte veshur.
Dhe ndërsa një foto e veçantë tregon atë që duket si një shenjë e vogël e rrumbullakët, zmadhimi zbulon se në të vërtetë është një rrudhë nga xhaketa e truprojës ndërsa ajo përkulet për të mbrojtur Trumpin me trupin e saj. I cili, teksa ngre dorën shtrënguar në grusht, në imazhin tashmë monumental të parullës "Lufto!" që i drejtohet publikut, nuk duket se ka veshur jelek mbrojtës.
+1 “Nuk do të më linin të vrisja gjuajtësin”
“Unë quhem Jonathan ëillis”, ka shkruar dikush në platformën e komunikimit 4chan, “dhe unë jam këtu për të bërë me dije publikun se kam pasur vrasësin në sy për 3 minuta, por shefi i Shërbimit Sekret nuk më dha urdhër për ta eliminuar. Është 100% e vërtetë që më penguan nga lart të vrisja atentatorin përpara se të qëllonte Presidentin Trump .'
Megjithatë, nuk ka asnjë oficer të Shërbimit Sekret ose të Policisë lokale në Butler, Pensilvani me emrin Jonathan ëillis. Pasi nuk përmendet askund në internet për një agjent të tillë. Një zëdhënës i Shërbimit Sekret vuri në dukje se snajperët trajnohen dhe urdhërohen të veprojnë sa herë që vërejnë një kërcënim, pa pritur udhëzime ose urdhra për të qëlluar një të dyshuar./ Versus.al
