Departamenti Amerikan i Drejtësisë ka arrestuar një person që dyshohet se kishte planifikuar një sulm në ditën e zgjedhjeve në emër të grupit të Shtetit Islamik.
I dyshuari, Nasir Ahmad Tawhedi, 27 vjeç, është shtetas i Afganistanit me banim në Oklahoma City, Oklahoma, sipas prokurorëve.
“Ky i pandehur, i motivuar nga ISIS, dyshohet se ka komplotuar për të kryer një sulm të dhunshëm, në ditën e zgjedhjeve, këtu në atdheun tonë”, tha drejtori i FBI-së, Christopher Wray në një deklaratë të martën.
FBI tha se ai po përpiqej të grumbullonte armë zjarri dhe kishte ndërmarrë hapa për të shitur pronat e familjes së tij dhe për t’i zhvendosur ata jashtë shtetit.
Tawhedi është i akuzuar për përpjekjen për të ofruar mbështetje ose burime për një organizatë të huaj terroriste për të kryer një krim ose akt terrorizmi.
FBI tha se Tawhedi ka punuar me një bashkëpunëtor të paidentifikuar, i cili është një i afërm i mitur dhe gjithashtu një shtetas i Afganistanit. I arrestuari dhe bashkëpunëtori i tij janë takuar më 7 tetor me persona të infilstruar nga FBI për të blerë armë dhe municione të cilat do t’i përdornin për të kryer sulmin terrorist. Versus.al
