Rusia zhvendosi tanke shtesë, artileri dhe sisteme raketash në rajonin e saj jugor të Kursk të premten, ndërsa luftoi për të katërtën ditë radhazi për t'i dhënë fund një inkursioni tronditës nga forcat ukrainase.
Një video që provon dëmet e shkaktuara që nga fillimi i kundërofensivës ukrainase, video e postuar në mediat sociale dhe e verifikuar nga Reuters tregoi një autokolonë prej rreth 15 kamionësh ushtarakë rusë të djegur të ndarë përgjatë një autostrade në rajonin e Kurskut, në disa prej të cilëve kishte dhe trupa të pajetë.
Forcat ukrainase kaluan kufirin të martën në një goditje që e kapi në befasi ushtrinë ruse pas muajsh përparimesh graduale në Ukrainën lindore nga forcat e Moskës.
Politikanët dhe ushtria po i referohen një "pushtimi" ukrainas, gati dy vjet e gjysmë pasi Rusia nisi pushtimin e saj në shkallë të plotë ndaj fqinjit të saj.
Dy ditë pasi Shefi i Shtabit Ushtarak Valery Gerasimov i raportoi Presidentit Vladimir Putin se përparimi ishte ndalur, Ministria ruse e Mbrojtjes tha se forcat e saj "vazhdojnë të zmbrapsin një tentativë pushtimi nga Forcat e Armatosura të Ukrainës në territorin e Federatës Ruse".
Agjencia e lajmeve Interfax citoi ministrinë të thoshte se Rusia po dërgonte në kolona përforcime me sisteme raketash me shumë lëshime Grad, artileri dhe tanke.
Ushtria ukrainase ka qëndruar e heshtur për ofensivën, megjithëse presidenti Volodymyr Zelenskiy lavdëroi ushtrinë e tij të enjten për aftësinë e saj "për të befasuar" dhe për të arritur rezultate. Ai nuk iu referua në mënyrë të qartë Kurskut.
