Grupi Parlamentar i Partisë Demokratike, përmes Mocionit të 1/10 së deputetëve të Kuvendit, ka kërkuar sot zyrtarisht që Kuvendi të nis procedurën parlamentare për konstatimin e papajtueshmërisë së mandatit të deputetit socialist Vullnet Sinaj.
Sipas mocionit të firmosur nga 14 deputetë të PD, në dokumentin e bashkangjitur tregohen 30 prova që vërtetojnë se deputeti Sinaj ka ushtruar mandatin e tij në kundërshtim me nenin 70 të Kushtetutës që i ndalon përfitimin e fondeve nga buxheti i shtetit. PD pretendon se Sinaj ka përfituar rreth 36 mijë euro nga buxheti i shtetit.
“Nga verifikimi i të dhënave të Drejtorisë së Përgjithshme të Thesarit dhe Qendrës Kombëtare të Biznesit rezulton se deputeti i Partisë Socialiste, z. Vullnet Sinaj, nëpërmjet kompanive në pronësi të tij, ka përfituar të ardhura nga Buxheti i Shtetit. Shoqëritë “BIGALB GROUP” sh.p.k., “BIG LISUS” sh.p.k., “BIG DURRËSI” sh.p.k., “BIG PESHKOPIA” sh.p.k., “BIG ROI” sh.p.k., “BIG LEO” sh.p.k., “BIG LEZHA” sh.p.k., “BIG DRINI” sh.p.k., “BASHKIMI” sh.p.k., “TIRANA CASH & CARRY” sh.p.k., që janë në pronësi apo bashkëpronësi të deputetit Vullnet Sinaj, përmes vetëm 9 transaksioneve të verifikuara, kanë përfituar të ardhura nga Buxheti i Shtetit në shumën totale 3.689.814 lekë”- thuhet në denoncimin e bërë nga PD.
Vetë deputeti reagoi dje duke thënë se e kishte marrë me humor kërkesën e deputetëve të Partisë Demokratike. Ai tha se që prej vitit 2017 kishte hequr dorë nga bizneset e tij që pas angazhimit në politikë.
Lajmi në përditësim…
Dokumenta bashkëngjitur
