Greqi- Kryeministri grek, Kyriakos Mitsotakis ka dhënë një konferencë shtypi para gazetarëve grekë ku ka folur lidhur me prioritetet e qeverisë së tij gjatë këtij sezoni të ri politik.
Ndër të tjera, ai foli edhe për marrëdhëniet me Shqipërinë të cilat i konsideroi si të ndërvarura nga mënyra e trajtimit të minoritetit grek në vendin tonë dhe të drejtat pronësore që ata kanë në Himarë.
Ndërsa teksa u pyet për marrëdhëniet me kryeministrin e Shqipërisë Edi Rama pas lirimit nga burgu të Fredi Belerit, Mitsotakis nuk preferoi të fliste për këtë çështje duke e cilësuar atë si një periudhë të vështirë në marrëdhëniet mes dy vendeve.
“Ne duam marrëdhëniet më të mira të mundshme me të gjithë fqinjët tanë , përfshi edhe Shqipërinë. Kaluam një periudhë të vështirë dhe nuk dua të flas me detaje për rastin e Fredi Belerit. Dua të shpreh kënaqësinë time për faktin që ai ishte me ne në Panairin Ndërkombëtare dhe që kjo aventurë krejtësisht e padrejtë dhe e panevojshme që ai kaloi, më në fund mbaroi.
Më lejoni të them edhe një herë se marrëdhëniet, duke parë imazhin e gjerë , pra marrëdhëniet midis Greqisë dhe Shqipërisë, që ne duam të jenë shumë të mira, kalojnë nga respektimi i të drejtave të pakicës kombëtare greke të Shqipërisë.
Çështja e të drejtave pronësore nuk ka dalë asnjëherë nga axhenda jonë. Ajo po rikthehet dhe ajo që ne do të bëjmë është të sigurojmë, me ndihmën edhe të Fredi Belerit në Parlamentin Europian, që të drejtat pronësore të bashkatdhetarëve tanë në Shqipëri të respektohen plotësisht. Dhe do të thoja se ky është një kusht i domosdoshëm që Shqipëria të vazhdojë të ecë në rrugën e saj europiane”- ka deklaruar Mitsotakis në konferencë.
Çështja Beleri provoi edhe njëherë thyerjen e marrëdhënieve shqiptaro-greke, pasi fqinji jugor paralajmëroi vendin tonë se do të pengonte integrimin në Bashkimin Europian me arsyetimin se në rastin e Belerit po shkeleshin të drejtat e njeriut në pikën e prezumimit të pafajësisë.
Në korrik të këtij viti, Kuvendi shqiptar miratoi me 96 vota pro një memorandum për thellimin e bashkëpunimit me Greqinë i cili në thelb përmbante kërkesën për heqjen e ligjit të luftës i cili ende mbetet në fuqi nga pala greke edhe pas 84 viteve tashmë. Versus.al
