Një ditë pas raportimeve nga qytetarët për shpendë të ngordhur në masë, Shërbimi Veterinar i Vlorës ndërmori një inspektim në terren. Tre ekipe të specializuara veterinarësh u dërguan në plazhin e vjetër, pranë grykëderdhjes së Vjosës dhe në Lagunën e Nartës. Gjatë vizitës, ata grumbulluan shpendët e ngordhur dhe morën mostra për të përcaktuar shkaqet e ngordhjes.
Specialistët e Shërbimit Veterinar kanë shprehur shqetësim për mundësinë e pranisë së gripit të shpendëve, një sëmundje infektive që ndodhet shpesh herë tek shpendët e egër, por mund të shfaqet si një epidemi në popullatat e shpendëve të oborreve dhe atyre në komplekse të mëdha.
‘Me të marr sinjalizimin nga banorët e zonës përreth ne si drejtori e veterinarisë ngritëm grupe kontrolli për të monitoruar gjendjen. Ne dyshojmë për gripin e shpendëve, por ne morëm mostra dhe do ti dërgojmë për verifikim dhe përgjigjja vjen 3 ose 4 ditësh. Këto që janë gjetur të ngordhura janë shpendë të egra, shpendë uji. Tek shpendët e egra, gripi i shpendëve është në gjendje të fshehur, por tek shpendët e shtëpisë shfaqet në formë epidemie. Urojmë të mos jetë gripi i shpendëve, tek njerëzit nuk është shfaqur, s’kemi pasur raste të tilla në vendin tonë. Për këtë sëmundje nuk ka vaksinim, por bëhet vetëm eleminim i atyre shpendëve të prekura', wshtw shprehur inspektori veterinar në Drejtorinë e Shërbimit Veterinar Vlorë, Demir Dervishaj për 'Report TV'.
Po sipas Dervishajt mostrat janë dërguar në Institutin e Sigurisë Ushqimore në Tiranë dhe për 3 apo 4 ditë pritet të dalin rezultatet. Gripi i shpendëve është një sëmundje virale që transmetohet shpejt mes shpendëve dhe mund të shkaktojë dëme të mëdha për faunën dhe bujqësinë në zonat rurale./Versus.al
