Një ndër asetet më të veçanta të trashëgimisë ushtarake shqiptare është kthyer në një atraksion të pazakontë për adhuruesit e zhytjes dhe aventurës nënujore: bëhet fjalë për avionin luftarak MiG-21, të cilin turistët tashmë mund ta eksplorojnë në ujërat e kristalta të bregdetit të Dhërmiut.
Në një postim në rrjetet sociale, ministri i Mbrojtjes, Pirro Vengu, ndau një video dhe mesazh ku theksoi rëndësinë e këtij transformimi simbolik:
"Nga simbol i historisë sonë ushtarake, në destinacion për zhytes vendas dhe të huaj. Avioni MiG-21 i zhytur në bregdetin e Dhërmiut është kthyer në një nga atraksionet më të veçanta nënujore në Shqipëri! Një shembull i bukur sesi trashëgimia e së shkuarës mund të marrë jetë të re përmes turizmit dhe aventurës!"
I vendosur qëllimisht në fundin e detit nga autoritetet, MiG-21 është kthyer në një pikë referimi për turizmin e qëndrueshëm dhe atë tematik në Shqipëri, duke përfshirë të apasionuarit pas zhytjes që kërkojnë eksperienca unike në Mesdhe.
Ky avion i famshëm sovjetik, pjesë e flotës shqiptare gjatë dekadave të regjimit komunist, ka qenë për vite me radhë simbol i mbrojtjes ajrore të vendit. Sot, ai është “ri-mobilizuar” jo për mbrojtje, por për edukim, kujtesë dhe tërheqje turistike.
Zhytësit profesionistë dhe klubet e diving-ut tashmë ofrojnë ture të organizuara drejt kësaj pike nënujore, duke kombinuar eksplorimin e botës së heshtur të detit me një përvojë autentike të së kaluarës shqiptare.
Përtej pamjes spektakolare, kjo nismë konsiderohet një model suksesi për integrimin e trashëgimisë ushtarake në turizmin kulturor dhe natyror. Ekspertët sugjerojnë që raste të tilla duhet të shtohen në vend, duke u bërë ura mes historisë dhe zhvillimit të turizmit tematik.
Një detaj interesant mbi MiG-21
Avioni MiG-21 ishte një nga asetet më të përhapura të fuqive komuniste gjatë Luftës së Ftohtë. Në Shqipëri, ai u përdor nga forcat ajrore për dekada të tëra, përpara se të dilte jashtë përdorimit në fillim të viteve 2000.
