Një ngjarje e rëndë ka ndodhur këtë të diel në zonën e Shkopetit, në Lezhë, ku një i ri 22-vjeçar ka humbur jetën tragjikisht pasi është mbytur në lumin Mat.
Sipas burimeve nga vendngjarja, i riu ndodhej në lumë duke u larë, kur për shkaqe ende të paqarta ka humbur jetën. Trupi i viktimës është nxjerrë nga efektivët e Policisë dhe është dërguar në morgun e Tiranës për ekspertizë mjeko-ligjore.
Deri në këto momente, identiteti i të ndjerit nuk është bërë publik, ndërsa pritet që Policia e Lezhës të dalë me një deklaratë zyrtare për të sqaruar më shumë rreth rrethanave të kësaj tragjedie.
Ky është një rast tjetër që nënvizon rrezikun serioz të larjes në lumenjtë shqiptarë, sidomos gjatë verës kur temperaturat e larta i shtyjnë të rinjtë të frekuentojnë zona të pasigurta dhe shpesh pa masa mbrojtëse. /Versus.al
