Një trafikant droge ka mundur t’i shpëtojë Policisë së Kosovës mbrëmjen e djeshme, duke braktisur një çantë me 21 kilogramë marihuanë. Ngjarja u regjistrua rreth orës 20:30, pranë kufirit Kosovë–Shqipëri, gjatë një patrullimi të forcave policore.
Sipas njoftimit zyrtar, trafikanti, ende i paidentifikuar, mbante në dorë një çantë të zezë dhe ishte i armatosur. Në momentin që ka vërejtur efektivët, ai u ka drejtuar armën, duke rrezikuar jetën e tyre. Pas kësaj, braktisi çantën e mbushur me lëndë narkotike dhe u largua me shpejtësi drejt zonës malore në territorin shqiptar.
Policia ka kontrolluar çantën dhe ka konstatuar se brenda saj kishte rreth 21 kilogramë marihuanë. Njësia e Antidrogës ka bërë matjet, ndërsa për rastin është informuar prokurori kompetent, i cili ka urdhëruar nisjen e procedimeve hetimore. Dosja tashmë po ndiqet nga Departamenti për Hetimin e Trafikimit të Narkotikëve në Prizren.
Njoftimi i Policisë së Kosovës:
Policia e Kosovës, respektivisht njësia hetimore nga Departamenti i Kufirit me datën 20.08.2025, rreth orës 20:30 gjatë veprimeve hetimore në zonën kufitare Kosovë-Shqipëri përgjatë vijës së gjelbër, ka hasur në një person të dyshuar i cili ishte duke e bartur një çantë dhe ishte i armatosur. I njëjti në momentin që ka vërejtur zyrtarët policorë ka drejtuar armën e zjarrit në drejtim të zyrtarëve policorë, duke paraqitur rrezik të drejtpërdrejtë ndaj tyre. Zyrtarët policorë kanë tentuar që ta ndalojnë të dyshuarin duke u prezantuar, mirëpo i njëjti ka hedhur çantën dhe ka arritur që të dalë në zonën malore në drejtim të Shqipërisë.
Lidhur me rastin është kontrolluar çanta ku është vërejtur sasi e substancës së dyshuar narkotike e llojit marihuanë, e cila pas matjes nga Njësia e Antidrogës ka rezultuar rreth 21 kilogramë (marihuanë). Për veprimet e ndërmarra lidhur me rastin është njoftuar prokurori kompetent, me udhëzim të të cilit është iniciuar rasti i cili mbetet të trajtohet nga DHTN – Prizren”, njofton Policia e Kosovës./Versus.al
