Pavarësisht se që prej ditës së sotme ka hyrë në fuqi urdhri i ministrisë së Brendshme për ndalimin e përdorimit të monopatinave nëpër rrugët e vendit, sërish në qendër të Tiranës shihen kudo skutera elektrikë të kompanisë ‘Bin Bin’.
Kjo e fundit njihet në Tiranë për faktin se jep skutera elektrikë me qira për përdorim të përditshëm duke mos patur as ndonjë kriter të rreptë për moshën.
Duke lënë mënjanë indiferencën ndaj kërkesës së Versus.al për informacion muaj më parë pas regjistrimit të disa aksidenteve me skuter, kompania vijon të injorojë edhe urdhrat e policisë për ndalimin e monopatinave.
Sot pati edhe raste kur qytetarët u përplasën me efektivët për ndalimin e monopatinave, duke bërë që shumë prej tyre të arsyetoheshin se nuk e kishin dëgjuar në lajme vendimin dhe se nuk kishin patur kohë për të marrë masa të tjera transporti për në punë. Versus.al
