Gjykata e Posaçme u mblodh sot për mbi 4 orë në dhomë këshillimi, pas një seance që zgjati vetëm 5 minuta, për të shpallur vendimin ndaj anëtarëve të grupit kriminal të arrestuar në kuadër të dosjes “Metamorfoza”.
Në total, 5 prej të akuzuarve u dënuan me 38 vite burg, ndërsa për ish-shefin e forcave operacionale, Oltion Bistri, masa u shua dhe u urdhërua lirimi i menjëhershëm nga qelia.
Vendimet kryesore
Oltion Bistri – U dënua me 2 vite burg për zbulim të të dhënave sekrete dhe u shpall i pafajshëm për korrupsion dhe pastrim parash. Ai lirohet sot, pasi dënimi i është llogaritur i shlyer gjatë paraburgimit.
Xhevair Lita, ish-kryeprokuror i Kukësit – U dënua me 5 vite burg, që me gjykim të shkurtuar u ul në 3.4 vite. Për shkak të shlyerjes së dënimit, u urdhërua gjithashtu lirimi i menjëhershëm.
Edmond Preka – 10 vite burg, të reduktuara në 7 vite. Do t’i vuajë në burg të sigurisë së lartë.
Behar Brajoviç (Bajri) – 13 vite burg, të ulura në 8.8 vite me gjykim të shkurtuar. Vuajtja e dënimit në burg të sigurisë së lartë.
Astmer Bilali – 8 vite e 6 muaj burg, që pas uljes shkojnë në 5.8 vite. Edhe ai do të vuajë dënimin në burg të sigurisë së lartë.
Vendimi për ish-drejtuesin e policisë Ardit Hasanbegaj dhe biznesmenin strategjik Pëllumb Gjoka do të jepet më 2 dhjetor, pasi avokatët e tyre nuk kanë paraqitur ende mbrojtjen.
Trupa gjykuese
Vendimi u dha nga trupa e përbërë prej gjyqtareve Etleva Deda, Irena Gjoka dhe Flora Hajredinaj, pas një këshillimi thuajse katërorësh.
Çfarë kërkoi SPAK?
SPAK kërkoi në total 74 vite burg për 7 të pandehurit — mes tyre ish-policë, ish-prokurorë dhe biznesmenë.
Pëllumb Gjoka – 14 vite burg për grup kriminal, korrupsion dhe sigurim kushtesh për vrasje.
Behar Bajri – 15 vite burg për të njëjtat akuza, si dhe armëmbajtje pa leje.
Edmond Preka – 11 vite burg.
Astmer Bilali – 10 vite burg, për sigurimin e kushteve për vrasje të Ibrahim Licit, Genc Tafilit dhe Dorian Dulit.
Xhevair Lita – 6 vite burg për korrupsion pasiv (dy episode) dhe zbulim aktesh sekrete.
Ardit Hasanbegaj – 9 vite burg për sigurim kushtesh për vrasje dhe pjesëmarrje në grup kriminal.
Oltion Bistri – 9 vite burg të kërkuara nga SPAK për korrupsion, pastrim parash dhe zbulim akte sekrete.
Të gjithë përfituan nga gjykimi i shkurtuar, që ul automatikisht 1/3 e dënimit në rast shpalljeje fajtor.
Për vrasjen e Gjin Ndojit, pjesë e transkriptimeve të “Metamorfoza”, ku akuzohen Gjoka, Bajri dhe Preka, procedimi vazhdon veçmas me gjykim të zakonshëm.
Zbardhja e dosjes u bë mbi bazën e komunikimeve të siguruara nga aplikacioni SKY ECC, përdorim i të cilave është kundërshtuar nga disa prej avokatëve të të pandehurve, të cilët pretendojnë se provat janë marrë në mënyrë të paligjshme./Versus.al
