Ka humbur jetën 35-vjeçari që u lëndua nga zjarri pak ditë më parë në një pikë karburanti në autostradën Durrës-Tiranë, pasi një autobot u përfshi nga flakët.
Punonjësi i karburantit i cili kishte pak muaj i martuar, ka ndërruar jetë në spital në Tiranë, pasi nuk ka arritur t’i mbijetojë plagëve të marra nga flakët.
Nga aksidenti i ditës së premte i plagosur mbeti edhe punonjësi tjetër i karburantit, 20-vjeçari Xh.K.
Njoftimi i policisë Durrës:
Rreth orës 14:00, në autostradën Durrës-Tiranë, në një pikë karburanti, është përfshirë nga flakët një automjet që transporton karburant. Për pasojë janë lënduar shtetasit Xh.K., 20 vjeç, banues në Kamëz dhe shtetasi E.P., rreth 35-vjeç, (të dy punonjës të karburantit), të cilët janë trasportuar në spital për ndihmë mjekësore.
Ndërhyrja në kohë e shërbimeve zjarrfikëse dhe Policisë ka izoluar flakët duke shmangur përfshirjen nga zjarri të çisternave me karburant. Shërbimet e Policisë evakuan në kohë, personat e tjerë që ndodheshin rreth zonës në rrezik.
Zjarri është shuar tërësisht dhe lëvizja e mjeteve në të dy krahët e autostradës po vijon normalisht.
