Një depozitim litiumi është zbuluar në fshatin Kolonjë, në rrethin Gjirokastër, ku kompania “Albanian Gold” organizoi sot një dëgjesë me banorët e zonës.
Sipas saj, rezervat nëntokësore kapin rreth 191.920.933 ton mineral, me një përqindje mesatare litiumi prej 235,45 ppm.
Banorët treguan dyshime dhe kërkuan më shumë transparencë mbi këtë projekt dhe ndikimin e tij në mjedisin ku jetojnë.
Igli Frëngu, një nga banorët e fshatit i drejtoi pyetje drejtuesit të kompanësi mbi ndikimin që mund të ketë ky projekt.
“Nga ligji tokë unë nuk përfitoj nga mosha. Gërmimet vazhdojnë 25-30 vite, pasoja më e madhe është te kurrizi im, që kam jetëgjatësinë më të madhe.
Çfarë sigurie do të na jepni për cilësinë e punimeve që do të bëni juve, rrezikshmërinë që ne do të kemi nga punimet që ju do të bëni? I duam transparente dhe të monitoruara. Litiumi nuk njihet në Shqipëri. Këtu nuk jeton as Tirana, as ministria, as kryetari i bashkisë, as bashkia, këtu jetojmë ne. Përhapja e litiumit në sipërfaqe ne duhet ta dimë, ministria duhet të përgjigjet se ju jeni privatë.”-tha ai.
Një tjetër shqetisim u ngrit dhe banori i fshatit Beqir Gjika, dikur ish-kryekomunar i zonës pyeti privatin për garancitë e projektit.
“Na duhet kohë për të marrë vendim për këtë projekt. A çlirohen gazra, a është i dëmshëm apo jo? Ju thatë që e keni mbyllur çdo gjë dhe ju kam marrë këtu të flisni. Ju nuk keni mbyllur asgjë pa folur ne këtu, pa folur fshati. “-u shpreh Gjika.
Edhe Bashkia Gjirokastër, me përfaqësuar nga sekretari i përgjithshëm Nertil Nebiaj, kërkoi sqarime për Vendimin e Ndikimit në Mjedis (VNM).
Nebiaj, pyeti për Vendimin e Ndikimit në Mjedis, nëse kompania e kishte apo jo.
“Duhet transparencë, jemi pro projektit por duhet transparencë. Ne akoma nuk dimë a është miratuar VNM-ja në bazë të VKM-ve për këtë projekt.”-tha ai.
Kompania Albanian Gold thotë se ka bërë shpime për 4 vitet e fundit në këtë zonë, ku ka rezultuar se është gjetur një rezervë shumëmilionëshe litiumi.
Në këtë zonë, kompania kërkon të marrë 09 km katrorë për ta shfrytëzuar. Peizazhi i kësaj zone është i njohur në të gjithë krahinën e Kurveleshit, ndërsa toka ku mendohet se ndodhet litiumin deri më tani është përdorur nga banorët që jetojnë në zonë dhe merren me blegtori.
