Media greke “Protothema” i ka kushtuar një artikull të gjatë çështjeve “të nxehta” mes Greqisë dhe Shqipërisë. Duke e nisur artikullin me Çështjen Çame e cila konsiderohet prej tyre si “inekzistente”, artikulli vijon me mospërmbushjen e detyrimeve që sipas Greqisë, Shqipëria duhet të kishte plotësuar në kuadër të marrëveshjes së “Paktit të Korfuzit” të nënshkruar më 1917 për njohjen e autonomisë së zonave që grekët i quajnë “Epiri i Veriut”.
Artikulli vijon më tej me përmendjen e një shume prej 218,300,000 të cilën Greqia ia ka dhënë Shqipërisë për humbjen në luftën e dytë botërore.
Më pas, ky fakt tërhoqi diplomacinë greke në marrëdhëniet midis dy vendeve, pasi siç thuhet në një dokument të Ministrisë së Punëve të Jashtme në vitin 1984, Enti Shtetëror i Kontabilitetit dhe Kontrolli i Shtetit nuk mundën të vërtetonin shumën në fjalë në favor. të Shqipërisë, e cila u pagua në natyrë për dëmet e shkaktuara nga ushtria greke gjatë luftës greko-italiane!!!”.
Me kryeministër të atëhershëm Konstantinos Tsaldaris, sipas “Protothemës”, Greqia i pagoi Shqipërisë më 1942-in një shumë prej mbi 218 milionë dhrahmi për dëmet e shkaktuara nga ushtria greke gjatë luftës Greko-italiane të cilat asokohe do të konvertoheshin në mbi 680 milionë lekë.
Artikulli i kushton vëmendje të veçantë figurës së Mbretit Zog, Enver Hoxhës dhe më pas Sali Berishës duke theksuar se këta dy të fundit kishin shpallur anulimin e vendimeve të marra nga pushtetet para tyre. Në këtë mënyrë media greke shkruan se Greqia duhet të kërkojë kthimin e menjëhershëm të shumës së dhrahmive të paguara duke i konvertuar ato në monedhën aktuale.
“Shqiptarët nuk janë nga ata njerëz që e tolerojnë skllavërinë. Historia jonë është dëshmi e kësaj, malet dhe pyjet tona janë të mbushura me jehonën e betejave heroike të të parëve tanë të cilët luftuan ashpër me shekuj, kundër shtypësve të tyre"- shprehej Enver Hoxha në një fjalim të tij, për të cilin media greke shprehet se gënjeu duke thënë se kur italianët sulmuan grekët, shqiptarët dolën në krah të këtyre të fundit.
Sa i takon “Ligjit të Luftës” që Greqia e ka ende në fuqi me vendin tonë, për të cilin parlamenti ynë paraqiti një rezolutë, në artikull pretendohet se qeveria e Andreas Papandreut në vitin 1987 i dha fund luftës me Shqipërinë. Më tej shtohet se shkaku përse ky ligj është ende formalisht e vlefshme është sepse mban firmën e mbretit Zog dhe heqja e këtij ligji nuk është nënshkruar nga presidenti dhe parlamenti i Greqisë.
Media greke shkon edhe më tej duke propozuar që Shqipërisë t’i vendoset kjo shumë e parave si kusht për vijimin e procesit të anëtarësimit në BE. Duke bërë një analogji të kërkesave të shqiptarëve për dëmshpërblimin mbi gjenocidin ndaj çamëve, artikulli pretendon se një gjë e tillë nuk është e drejtë kur Shqipëria mori një shumë “të panevojshme” nga Greqia 82 vite më parë. Versus.al
