Pas përfundimit të zgjedhjeve të 11 majit, ku Partia Socialiste doli fituese, Kryeministri Edi Rama ka marrë një sërë urimesh nga liderë të rëndësishëm botërorë, të cilët kanë përgëzuar fitoren dhe kanë shprehur gatishmërinë për të forcuar bashkëpunimin me Shqipërinë në vitet në vijim.
Ndër urimet më të spikatura në gjuhën shqipe ishte ai i Presidentit të Francës, Emmanuel Macron, i cili në një postim në platformën X shkroi:
“Urime Edi Rama, mik i dashur, për fitoren tënde në zgjedhjet parlamentare. Franca do të jetë gjithmonë në krah të Shqipërisë në rrugën e saj drejt Bashkimit Europian. Do të takohemi që të premten në Samitin e Komunitetit Politik Europian dhe për një vizitë që duhet të na lejojë të forcojmë edhe më shumë partneritetin tonë.”
Urime kanë mbërritur edhe nga liderë të tjerë europianë dhe përfaqësues të institucioneve ndërkombëtare, të cilët kanë vlerësuar procesin zgjedhor dhe kanë theksuar rolin e Shqipërisë si një partner i rëndësishëm në rajon dhe më gjerë.
Zyrtarë të Bashkimit Europian, në reagimet e tyre, kanë shprehur pritshmëritë për vijimin e reformave dhe thellimin e integrimit të Shqipërisë në strukturat europiane.
Urimi i Presidentit të Emirateve të Bashkuara Mohammed bin Zayed Al Nahyan:
Urime të sinqerta Kryeministrit Edi Rama për rezultatin e zgjedhjeve parlamentare në Shqipëri. Lidhjet midis Emirateve të Bashkuara Arabe dhe Shqipërisë kanë parë një rritje të fortë vitet e fundit dhe jam i bindur se së bashku mund të vazhdojmë të zgjerojmë bashkëpunimin dhe të promovojmë zhvillimin e mëtejshëm në të mirë të kombeve dhe popujve tanë!
Urimi i presidentes së Italisë Giorgia Meloni:
Dëshiroj t’i dërgoj urimet më të sinqerta kryeministrit Edi Rama për rikonfirmimin e tij si drejtues i qeverisë shqiptare.
Miqësia e thellë dhe bashkëpunimi strategjik që lidh dy kombet tona është forcuar më tej falë nismave të përbashkëta, rezultat i dialogut konstruktiv dhe një vullneti të përbashkët për të përballuar sfidat globale me zgjidhje inovative.
Ne do të vazhdojmë të punojmë për të konsoliduar më tej lidhjen midis dy qeverive tona dhe për të arritur objektiva të përbashkëta, duke përfshirë forcimin e stabilitetit në Ballkan dhe avancimin e rrugës evropiane të Shqipërisë!
Urimi i kryeministrit britanik Keir Starmer :
Urime @ediramaal për fitoren tuaj historike në zgjedhje. Pres me padurim të vazhdojmë bashkëpunimin tonë për të sjellë rezultate për njerëzit që punojnë në të dy vendet tona!
Urimi i kryeministrit të Spanjës, Pedro Sanchez:
Gëzuar, Edi Rama për fitoren bindëse të Partisë Socialiste në zgjedhje. Shqiptarët mbështesin në shumicë përpjekjet që Shqipëria t’i bashkohet Bashkimit Evropian. Urime!
Urimi i kryeministrit të Hungarisë, Viktor Orban:
Urime Kryeministrit @ediramaal për fitoren e tij bindëse në zgjedhjet parlamentare të Shqipërisë. I dashur Edi, mezi pres t'ju shoh këtë të premte në Tiranë në atë që mund të jetë një Samit historik i EPC-së!
Urimi i kryeministrit të Kroacisë, Andrej Plenkovic:
Urime Kryeministrit @ediramaal për fitoren në zgjedhje! Pres me padurim forcimin e mëtejshëm të marrëdhënieve dypalëshe dhe vazhdimin e bashkëpunimit në kuadër të @NATO-s dhe forumeve të tjera ndërkombëtare. Me kënaqësi pres të marr pjesë në samitin e Komunitetit Politik Evropian në Tiranë të premten!
Urimi i presidentes të KE-së Ursula von der Leyen:
I dashur Edi Rama, urime për fitoren tuaj zgjedhore! Nën udhëheqjen tuaj, Shqipëria ka bërë përparim të madh drejt Bashkimit tonë. Le të vazhdojmë të punojmë ngushtë së bashku për reformat e BE-së. Shqipëria i përket BE-së! Pres me padurim t’ju përgëzoj personalisht nesër në Tiranë!/Versus.al
