Shefja e kabinetit të kryeministrit, Vali Bizhga, ka dhënë dorëheqjen nga posti pas shumë vitesh në këtë detyrë. Ajo ka qenë një nga bashkëpunëtoret më të afërta të Edi Ramës, duke e shoqëruar që prej kohës kur ai drejtonte Bashkinë e Tiranës.
E njohur për profilin e saj të ulët publik, Bizhga është konsideruar shpesh si krahu i djathtë i kryeministrit.
Shëndeti mendohet të ketë qenë arsyeja kryesore e largimit, pasi edhe më herët ajo ka kaluar një betejë të vështirë me kancerin, të cilën e fitoi në vitin 2013, periudhë kur mori edhe drejtimin e kabinetit të Këshillit të Ministrave.
Pas saj, këtë detyrë pritet ta marrë Vilma Premti, e cila deri para pak ditësh ka qenë drejtoreshë kabineti e kryetares së Gjykatës Kushtetuese, Olta Zaçaj.
Më herët, që nga shkurti i vitit 2022, Premti ka mbajtur edhe postin e drejtoreshës së kabinetit të ministres Elisa Spiropali. Versus.al
